Bogi ni iTaukei e na Adi Senitoa

Update: 11:02AM NODA Railesu e na macawa oqo eda na wilika kina na kena dau bula ka namaki na bogi ni i Taukei e na gauna e dau vakayacori kina na Adi Senitoa.

Ni wilika sara na bogi ni i Taukei ka a vakayacori e na yabaki 1963, e na macawa ka dau namaki vei keda na lewe i Viti:

Sa oti koto yani na soqo ni Adi Senitoa kei na veika kece e da a marau tiko mai kina e na loma ni macawa taucoko sa oti me yacova sara na i ka otioti ni kena siga Vakarauwai sa oti ni a qai sarava kina e udolu vakaudolu na tamata sarasara na i lakolako ni Adi Senitoa e lomai Suva me yaco yani ki rara levu, na Albert Park.

E na bogi ni Vakaraubuka e a vakayacori kina e rara levu na Bogi ni i Taukei, na bogi talega ka a qai solia kina na karauni vei koya ka sa liu e na veisivisivi ni Adi Senitoa ni yabaki oqo, ko Ruci Koroi.

E dina ga ni a draki ca vakalailai tu na vanua e na bogi ko ya, ia e sega ni tarovi ira na i Taukei era a vakaitavi e na veivakamarautaki se me ra a yalo lailai kina, ka ni oqo na i otioti ni bogi ka ra gadreva kina me ra vakayacora na veika e so me sivia na veibogi yani e liu.

Era a tiko e na bogi ni i Taukei na Turaga Bale na Vunivalu (Ratu George Cakobau) kei ira na vei turaga lelevu tale e so vata kei na Turaganikoro e Suva o C A Stinson.

E a tekivu donu e na 8 na kaloko na soqo ni ratou sa mai yatuni tu e mata ni vale ni sarasara ko iratou na lewe tolu ka ratou a taura na i covi.

Na i matai ni covi me Adi Senitoa e a soli vei Ruci Koroi, ka vakaisalataki koya kina na Gone Turaga na Vunivalu ko Ratu George Cakobau.

E a i tavi nei Eta Uluvula na Adi Senitoa e na yabaki sa oti (1962) me kauta cake yani na i sala vua na Turaga na Vunivalu ka ratou yadravi koya yani e dua na matawesi bula, ka ratou meke yarayara tiko yani me yacova sara ni sa la�ki soli na i sala vei Ruci Koroi.

Ni vakatokari oti ga na i sala, e ratou sa qai vakaraitaki wavoki e na dua na lori (Landrover) na gone yalewa e lewe tolu ka ratou vakaicovi ko Ruci Koroi Gela Moore kei Adi Litia Samanunu.

E ratou a baci yadravi iratou tale voli na matawesi ka ratou a yadravi Eta ni kau cake nai sala.

E lako vata kei na i lakolako oqo, ka lako vata na i lakolako oqo na domo ni vakatagi ni mataivalu.

Oti koya sa tekivu sara na veivakamarautaki ni Bogi ni i Taukei ka liutaka ko Joeli Kaumaititiya.

A dolava taumada na veivakamarautaki na matasere ni Vale ni Lotu mai Nabua.

Sa totoka dina na kedra i rairai ni ra vakaisulu tavoi damudamu ramase qai mai kuria yani na malumu ni tolodra kei na ligadra lako vata na toso ni yaloka ni matadra.

Ni sa oti na veika kece era sa qai la�ki yatuni mai rara na matasere kei ira kece na vakaitavi e na Bogi ni i Taukei me ra lagata na noda sere kilai levu ni vakamoce na �Isa Lei�.

More Stories