Bibi ni veituberi

E DUA na taro e dau tarogi vakalevu sa ikoya: ?A cava sa rui levu kina na veibiu se veisere ni vakawati e na gauna oqo??

E dua na tikina au dau vakabibitaka vei ira era taroga na taro oqo sa ikoya na kena gadrevi me yadravi na kena vakayacori na soli ni ivakasala ni bula vakawati ka vakatokai na Veituberi Taumada ni bera na vakawati me vaka au a sa cauraka mada yani e na tolu na yabaki sa oti ka na rairai yaga me da veitalanoa tale mada kina.

Sa inaki levu ni Veituberi Taumada (Premarital Counselling) sa ikoya me vukei na tamata yadua, ko ira na veitau kei ira na veiwatini vou ena nodra vakarautaki me ra tara cake e dua na bula vakawati ka vakarautaki me sotavi kina na marau, me vakawati vakaibalebale ka me rokovi kina na itaukei ni vakawati sa ikoya na Kalou.

E vica na ka e tovolei me yacovi se rawati ka inaki tiko ni Veituberi Taumada ni bera na vakawati.

Matai, sa ikoya me veitalanoa ko dauniveituberi kei rau na vakarau vakawati ka me ratou mai raica vata se cava sara mada na vuna e rau sa vakarau vakawati kina. A cava e rau namaka me yaco e na nodrau vakawati?

Vakaevei e bau viavia tautauvata li e so na ka e na nodrau bula me vaka nodrau vuvale, nodrau vuli, nodrau vakabauta vakalotu, nodrau yabaki ni bula kei na nodrau bula vakailavo?

E rau sa bau dau veitalanoataka tu li na duidui ni itavi ni tagane kei na yalewa vakawati?

Na kena dau tarai na veiulutaga oqo e cake, sa rawa ni raica ka vakila kina o koya na Dauveituberi (Counsellor) na veileqa e so kei na malumalumu ka dodonu me kilai rawa toka ka qaravi rawa ni bera ni rau qai vakawati na lewe rua.

Kena ikarua sa i koya na kena vakatavuvulitaki na ivakavuvuli Vakai Vola Tabu ka veidusimaki kina na Vosa ni Kalou e na veika me baleta na vakawati ka vakakina na itavi ni tagane kei na yalewa e na loma ni vakawati me vaka na ivakaro ni Kalou.

Dina beka ni sega sara ni tautauvata na titobu ni noda bula vakayalo kei na vakabauta, sa itavi dina ni Dauniveituberi me vakararamataki rau na via vakawati ena ivakasala vakayalo mai na Vosa ni Kalou.

E vuqa na lesoni vinaka e yaga me rau tuberi kina na veitau me vaka na Loloma (1Korinica 13), na itavi ni tagane kei na yalewa (Efeso 5:21 – 6:4 kei na Kolosa 3:16 – 20) ka vakakina na ivakaro ni Kalou me baleta sara ga na bula vakawati ka koto ena 1Korinica wase 7 kei na 1Pita 3: 1 – 7.

Ai katolu ni inaki ni Veituberi Taumada ni bera na vakawati sa ikoya me rau dui kilai rau kina na via vakawati tiko.

Ni vakayacori voli na veivosaki, e levu toka na veitalanoa kei na soli ivukivuki, ka sega mada ni rau se bera ni veikilai sara vakavinaka ko irau na lewe rua.

E na gauna esa lai tadodo kina na bula vakawati, sa vaka e rau sa matau totolo na lewe rua, ia e muri sa qai dau basika ni rau bera sara tu ga vakalevu ka yali na matua ni bula vakayalo, na vakasama kei na yago.

Ena rawa wale ga ni rau vorata na ibili ni bula mai tuba kei na dredre kei vuravura kevaka e rau sa matau na veitau e na nodrau vakarautaki vakavinaka ni bera na vakamau.

Na ivakaraitaki ni matua oqo e koto e na nodrau tauri vakamalua ka me kakua ni rau rawai e na gagano se gagadre ga vakayago, me rau tu vakarau me rau veinanumi, nona kauwaitaka vakabibi e dua vei rau nona bula o koya kadua, na nodrau vakaraica kece na veiyasa ni bula kei na nodrau tu vakarau me rau sotava na dredre ka vaqara na kena iwali. Me rau dui vakila mada na lewe rua na veitikina e malumalumu kina o koya kadua, na duidui ni rai, ka tovolei me vakotori donu na ikotokoto ni kena bulataki na bula e na veitabayabaki e vuqa sa koto e matadrau.

Na kena ikava sa ikoya na kena vakauqeti na veivosaki, veitaratara kei na veiwekani vinaka vakaveiwatini.

E dua na leqa levu ni bula vakawati ka laurai ni dau tini vakavuqa ki na kavoro ni veiwatini sa ikoya na leqa ni kena lecavi na iwalewale uasivi ni veitaratara (effective communication skills).

Ni sa leqa ga na veitaratara sa na dredre sara na toso ka tini ki na kavoro. Na veitaratara sa ikoya na vanua e na dabe tiko kina vakalevu na bulataki ni vakawati e na veisiga ka ni na vakatautaki tale ga na daumaka se ca ni dua na siga e na ivakarau ni veitaratara e vakayacori kina.

Ni bera ni rau vakawati e lewe rua, sa ka bibi me vakaraitaki vei rau na kena rui bibi me rau tasereka vakadodonu na dui lomadrau, me rau wasea na nodrau dui ririko se lomaleqa kei na lomatarotaro me baleti koya kadua.

E na gauna e wasea tiko kina e dua vei rau na veika bibi e tara na yalona se nona vakasama, sa ka bibi vei koya kadua me vakarorogo sara vakavinaka ka ni wasea tiko ko kena isa na veika e okata me rui bibi vua ka sega ni dodonu me lecavi se veiwalitaki.

Me rau sa tuberi tale ga me rau vakamatautaka me rau veitalanoa se tasereka na veika e tu e dui yalodrau ka ni kena tabonaki se sogoti e na qai tini kacabote e na dua na gauna ka rawa ni vakatubu leqa levu sara ke kacabote e na gauna kei na vanua cala.

Na kena ikalima ni inaki ni Veituberi Taumada na Premarital Counselling sa ikoya me rau vakauqeti me rau vakabutuka vakamalua na veisala e so e rawa ni wali kina e vuqa na nodrau leqa ka qai dau tubu e na nodrau bula vakaveiwatini.

E dua dina na ka dredre na kena tovolei me rau mai vakaduavatataki e lewe rua ka tu e vuqa sara na ka e rau duidui kina. Na veiduidui oqo e tara na vuvale, na ivakarau ni nodrau raica na bula, na ilavo, duidui na veika e rau taleitaka se vakabibitaka (interests and values).

E koto tale ga na duidui ni nodrau raica na dui wekadrau, ka vakabibi sara oqo na itubutubu e na yasana ruarua ka vakakina na duidui ni nodrau raici ira nodrau itokani se ilawalawa. Na veika kece oqo e dodonu me tasereki ka vakamatatataki yani ni bera ni qai tadolovi na sala-tu ni bula vakawati.

Ko ira na noda gone ena gauna oqo, dina ni ra sa tautauvata ena rawa-ka vakavuli, ia e tu dina e vuqa sara na duidui ena nodra itutu vakaiyau, vakabauta vakalotu, kauwaitaki ni veiwekani ka rokovi se dokai ni noda ivakarau ni bula nai Taukei kei na veika matailalalai e kovuta.

Na kena ikaono sa ikoya na kena vakataudeitaki ni rau sa yalodina ka lomadonu me rau curuma na bula vakawati, aya me laurai ni rau sa vakayalotaka na lomani bibi ni bula e rau sa vakarau curuma yani.

Kevaka e rau taura tu ga vakarawarawa ena yalo vagone, ena veivakasalataki ko Dauniveituberi me se tei wawa mada na vakawati me yacova ni rau sa vakarau vakavinaka ena yago, vakasama kei na yalo.

More Stories