Bibi na yavu va-Kalou

Update: 10:47AM ENA macawa tolu eda sa lako sivita, eda a tara tiko mai kina na veiulutaga ka tara na veibiu se veisere; ena kena sa toso cake tiko ga e na veiyabaki. Sa sega ni tara wale ga na noda veikoro ni cakacaka, ia sa tara tale ga vakabibi na noda veikoro Vakaviti.

E na macawa oqo, au sa na tekivuna yani kina na nodra vakarautaki na cauravou kei na goneyalewa ni bera ni ra curuma na vale ni nodra vakawati. 

E dua tiko na vu ni kavoro ni bula vakawati sa ikoya na nodra sega ni vakayavutaki vakavinaka ko ira era vakarau vakawati ena kila na inaki kei na bibi ni bula vakawati.

A cava sara mada na vu ni vakawati? A cava eda vakawati kina?

E levu nai sau ni taro e rawa ni da vakasamataka. Ia oqo e so e dau rogo vakalevu:

Me�u vakawati me�u rawa ni qaravi se�u qarava e dua.

Me rawa ni keirau leweruataka tu na veicolacola kece.

Me�u rawa ni vakataucokotaka kina noqu gagadre vakayago ka rawa ni�u veiyacovi (sex) ena gauna ga au vinakata kina, ka sega tale ni�u qai loma rere se �guilty.�

Me�u rawa ni levea kina nodra taro na wekaqu: �Gauna cava o sa na qai vakawati kina?�

Na kena oqo kei na vuqa tale sa i ira na veiyavu sa dabe tiko kina nodra vakawati e lewe vuqa e vuravura edaidai.

Ia ni da via kila nai naki dina ni vakawati, eda na lesu ga ki nai tekitekivu ni tamata taumada. Na vakawati e i naki Vakalou: Vakatekivu 2:18 �Sa sega ni vinaka me tiko duadua na tamata: au na bulia edua na dauveivuke e yaga vua.� 

E tiko duadua na tamata, ka sa raica na Kalou ni sega ni lasa se logaloga vinaka nona tiko ni sega tale e dua e rau tautauvata me veitokani kaya. 

E nai Vakatekivu 2:19-20, era tu wavolita na tamata na veimataqali manumanu manoa kei na manumanu kila, ko ira era vuka e tabadra, ko ira era qasi se dolo e dela ni qele kei ira era lako se cici e yavadra. 

Sa soli vua na tamata e dua na i tavi dokai, sai koya me vakatokayacataki ira na manumanu kecega. 

Vei ira na umatamata na Jiu, era dau solia ga na yaca na tuka ni gone, tamadra levu na gone se budra na gone. E dau solia na yaca o koya e vakaliuci se tiko vua na lewa.

Na Kalou ga ka a solia tiko na yacadra na veika a bulia mai nai matai ki nai kaono ni siga, sa solia na kaukauwa ni nodra vakayacani na manumanu kecega vua na tamata. 

De a nakiti beka me bau wele ka lasa na tamata vei ira na veimataqali manumanu e na totoka ni kedra ibulibuli, kedra roka kei na duidui ni nodra ivalavala; ia e sega ni mani vakakina ka ni kaya na tikina e 20b �ni sa sega ni kune e dua na itokani vinaka me nona i vukevuke yaga.� 

Ko ira kece na milioni na manumanu oya e tiko na kedrai dui sa. 

Ke mani vaka tu evei na kaukauwa ni nodra veiciciyaki, se rerevaki ni nodra tagi, kodro se veivala, e tiko ga na gauna e rau mai vakaciriloloma kina ni rau sa tiko vakaveisa vata. 

Oya na tiki ni gauna sa qai vakilai kina na galili kei na laladidi ni bula ni tamata ka cavuti kina na vosa: �ia sa sega ni kune e dua nona i vukevuke yaga.�

Nai vukevuke yaga sa buli me vakataucokotaka na veika e sega ni sotava se yacova rawa na tamata taumada. 

E sega ni rawa ki na tamata me veisa kei na dua vei ira na manumanu, e sega ni rawa ni veisa kei ira na agilosi mai lomalagi se dua tale nai bulibuli e vuravura. 

Sa lewa kina na Kalou me buli tale e dua na tamata ka me i vukevuke yaga ka i vakataucoko kei Atama. 

Mai keya talega, sa bucina kina na Kalou na vakawati me i cegucegu ka ivakataucoko ni bula ni tamata. 

Na yavu e duabau e tagane kina e dua na tagane ka yalewa kina e dua na yalewa sai koya me vakawati. 

E lewe levu e vuravura era sa vukica vakatani na vakasama ni vakawati, eso era raica me nodra dodonu me ra kakua ni vakawati ka lewe vuqa tale era sa digitaka me ra veiwatini vakamataqali vata, na tagane me ra veiwatini vakatagane ka vakakina ko ira na yalewa me ra veiwatini vakayalewa. 

Sa vakaraitaka na sesewa ena nodra sega ni kila ni ra mai tagane se yalewa wale ga ena i naki Vakalou me rau vakawati e dua na tagane kei na dua na yalewa.

E tolu tiko na yavu e lesia kina na Kalou me vakawati na tamata.

Matai, me rau vakataucokotaki rau vakairau.

Vei keda na tagane, nai vukevuke yaga – e sega ni dauveiqaravi (servant) se bobula (slave). E nomu tautauvata ka ivakacava ni nomu vakaiyalayala. 

E ivakataucoko ni nomu vakatikina. Na Kalou e nakita na watimu me vakataucokotaki iko. (She is my equal �.to balance each other, to fill each other�s gaps).

E dua na veiwatini e rau duidui, e duidui vakakina nai solisoli e dui tu vei rau. Sa nakiti na vakawati me vakataucokotaki rau. 

Ni ko semati donu tu vua na Kalou – mo kilai koya ka tubucake nomu veiwekani kaya, ka vakarorogo vua- sa na vukei iko mo raica na nomu i tau se watimu mei vakataucoko ni nomu bula. 

Ni qai sucu tiko mai e dua na gone, e sucu tiko mai me vakawati. 

Oya na vuna e tagane se yalewa kina e dua ni sucu mai, ka rawa tale ga ni cakacakataki kina na Vosa ni Kalou e na Vakatekivu 1: 27 – 28, me rau vakawa ka tubu me vakatawani vuravura.. 

Karua, na vakawati, sa vakuri kina na cakacaka ni Nona veibuli na Kalou.

E veibuli ga vakadua na Kalou. E loma ni vuvale ni vakawati, sa soli nai lesilesi ki na tamata me vakuria na nona veibuli na Kalou. 

Ena yavu oqo, na nodrau vagone na veiwatini sa sega ni ka me digitaki, ia sa dua nai lesilesi kai tavi Vakalou.(Vakatekivu 1:28) – Sa dua nai vakaro, aya, me ia na vakaluveni. 

Same 127: 3-5 – Na gone sai solisoli ni veivakalougatataki vei keda. 

E vakuri kina na veibuli ni Kalou, na Nona vinaka na Kalou kei na nona veivakalougatataki na Kalou.

Katolu, na vakawati sa koto kina na i yaloyalo ni noda veiucui kei na Kalou.

Vakatekivu 1:26-27

Ena vuvale Vakarisito, sa vakarairaitaki kina vei keda eso nai rairai talei ni Kalou, me vaka na loloma, veiwekani, veivosoti, veikauwaitaki, veivakaukauwataki kei na duavata (tama, tina,gone ka tautauvata kei na nodratou tiko na Lewe Tolu Vakalou (Tamana, Luvena , Yalo Tabu). 

Ni rau mai vauci vata e dua na cauravou kei na dua na goneyalewa e rau sa vakabulai, e rau sa na mai semata se wasea vata nai rairai ni Kalou ka uto ni nodrau vuvale. 

E na loma ni vuvale Vakarisito oya, era na raica kina na tamata nai yaloyalo talei ni Kalou.

More Stories