Batikoula

E TALANOATAKA ko Navulagi Lobau na tuirara vakacegu e Yakete ni dua na gauna makawa sara era a gole yani na marama ni Navilawa mera la?ki qoli ena uciwai ka drodro tiko ena yasa ni nodratou koro.

?Era sa veiloku sara na marama ka ra mai gole sobu yani me yacova sara na vanua e tiko kina na Qwara nei Batikoula,? e kaya o Lobau.

E tomana na nona i talanoa na turaga yabaki 57 qo ena gauna era sa caka sici tiko kina, oya na sici ni waidrano ka ra dau kakabi tu ena vatu, era qoli voleka sara tikoga ena veivatuvatu lelevu ka volekata tiko na Qwara nei Batikoula.

?Dede na nodra caka sici tiko sa mani sisinai na nodra noke ka ra sa veikacivi sara mera sa cabe e vanua me ra sa lesu tale ki nakoro.

Ra mani veikacivi ka ra veikacivi tale vakadua ni ra sa kila ni sa yali e dua vei ira na marama era a gole vata mai. Na marama e yali qo o Lewasau e marama ga ena loma ni neitou vuvale.?

E tomana na nona itukutuku na tuirara levu vakacegu mai Yakete qo ni ra kacikaciva na yacana, e sega vakadua ni bau rogo tale na domona na marama qo me bau sauma madaga mai na nodra kaci tiko na vo ni marama.

?Era sa mani lesu mai nakoro na neimami marama ena gauna ya, ka ra mai tiko voli e nakoro, oti e vica toka na siga, era kidacala ni sa cabe tu yani ki nakoro o Lewasau. Era a mani vakatarogi koya na lewenikoro ka mani sega ni vinakata me tukuna e dua na ka. Oti mani vakatarogi koya tale ka sa tukuna o koya vei ira ni tabu vua me talanoa, kevaka mena talanoataka na ka e raica, esa na rawa saraga ni mate ena gauna vata ga e talanoa oti kina.?

Ena nodra cikevi koya tiko na lewenikoro e Navilawa ka sa mani talanoa kina na marama qo, a tekivu na nona i talanoa ni a nunu yani ena loma ni wai ena aguna e ceuta tiko kina na sici ena vatu a mani raica sara e dua na gusu ni qara.

?A nunu yani ena loma ni qara ka mani la?ki yacova sara na vanua mamaca, ena cabe ki vanua esa tu ena dua na qara ka balavu sara ki loma na qara qo,? e kaya o Lobau.

E kuria o Lobau  ni a qai talanoataka o Lewasau ni loma ni qara vatu e taubaletaka tiko oqo e sa tatalivaliva wale tu ga na yasa ni qara taucoko ena veimataqali vatu talei.

Ena nona vakasarava tu na veivatu talei era tu e loma ni qara vatu qo, e a qai mani rogo vua e dua na domo me kakua sara ni mai talanoataka na veika e raica oya ka ni se bera na kena gauna me na kilai kina.

?Ni oti ga na nona talanoa oya sa mani cavuka talega na nona i cegu na marama qo,? e kaya.

E kuria o Lobau ni mai donui koya esa i ka va ni tabatamata o koya mai vei Lewasau ka se itukutuku makawa sara ka dina taucoko nai talanoa ni qara vatu qo.

E vakaraitaka ko Ratu Marika Saukuru ni vakatawa ni qara e dua na duna vakaitamera ka koula taucoko tu na batina. Ia, e tomana na nona i talanoa o Saukuru ni sega ga ni taura vinaka, na duna se na gata ka koula taucoko tu na batina ka dau vakatawana tiko na qara ka tiko qo e na loma ni uciwai e Sabeto.

More Stories