Au a biliraki, vu ni noqu mai volitaka na yagoqu

Update: 11:16AM �AU dau biliraki vakalevu mai neitou vale vei rau na noqu i tubutubu. Au qai dau tarogi noqu ta, se o cei dina mada na tamaqu, rau qai dau vunitaka vei au na veika au dau lomatarotaro voli kina,�

Oya na veika e talanoataka o Ana (yaca buli) e dua na goneyalewa ka sa volitaka tiko na yagona ena loma ni korolevu o Suva, e na gauna sara ga oqo.

�Levu na gauna au dau taroga vei rau na noqu Na kei Ta, se�u luvemudrau dina li se sega, se�u gone beka ni vei? Rau sega vakadua ni via tukuna vakadodonu vei au me yacova tu mai nikua,� e kaya o Ana.

E tukuna o Ana ena dua na siga ena nona suka mai na vuli a mani mokulaki koya sara vakaca na nona itubutubu turaga, ka sa mani biuta mai kina o koya na nodratou vale me mai wavoki voli ena koro levu o Suva.

O ya talega na siga esa tovolea kina o Ana na kamikamica kei na i saluwaki talei ni bula ena loma ni koroturaga o Suva.

�Ni oti na noqu mai sisi wavoki tiko e lomai Suva, au a mani lesu tale i vale ka la�ki vuli tale tiko i Tailevu,� e kaya na goneyalewa yabaki 31 qo.

�Na i karua ni gauna au biubiu tale mai kina i vale, au sa mai vakailala sara kei na dua na noqu itokani, a mani vakavulici au sara o koya ena i walewale ni bula ni vaqara i lavo totolo duadua, a ya me�u volitaka na yagoqu.

�Lakolako tiko na noqu volitaka na yagoqu au sa kila talega mai na kena i walewale me�u cakava, me�u rawa ni vakacegui koya vinaka kina o koya e kauti au me rawa ni lesuvi au tikoga mai.�

E tukuna o Ana ni a tekivu ga yani ena vanua ni vakacagicagi e Sukuna Park na nona sa tekivu me rawai ira na tagane ka me ra coriti talega vakarawarawa ena i vadi se na kaci tarabu e cakava toka, ka ni lako vata nai sulusulu kei na nona dau sauni koya vinaka tu.

�E a vakabukete taki au ga na noqu i tau ka keirau a sota ga e Suva, ka sa mani keirau veitalatala talega ena noqu lesu tale i nakoro vei rau na noqu i tubutubu,� e kaya.

�Au mani vakasucu, ka tagane na luvequ, mani yacova me vuli na luvequ ia ni sa toso tiko na nona vuli me la�ki yacova sara na i vakatagedegede e na �sekidari,� na gauna dredre ni bula vakailavo e da sa donumaka tu nikua, e sa mani uqeta tale na lomaqu me�u mai tovolea tale mada na sala ni rawa i lavo totolo, ka�u sa ciciva oti mai.�

Ena gauna qo sa fomu va tiko na luvei Ana, ia, e cauravou bulabula vinaka ka rau tiko vata ga ena nodrau vale ka rau rede tiko kina ena dua na taudaku ni korolevu kei Suva.

�Au mani mai tomana tale tiko na noqu volitaka na yagoqu me�u rawa i lavo kina,� e kaya o Ana.

�E duidui tu na i lavo keimami lavaka vei ira na tagane era vinakati keimami mai ka duidui talega na mataqali veivakacegui keimami vakayacora. Ena vakatau ena i lavo era via sauma mai vei keimami, keimami sa qai tukuna yani se mataqali veiqaravi cava keimami vakarautaka me ganita nai lavo e lavaka tiko mai.�

E tomana o Ana ni levu vei ira na turaga ni Viti ka ra sa sivia na yabaki 50 era dau lakova yani na vanua era dadabe voli kina na goneyalewa ka ra vaqara i lavo tiko ena nodra volitaka na yagodra.

E tukuna o Ana me yacova mai na gauna qo esa rauti koya vinaka sara ga e rua na tagane, ena dua na siga, ka ni sa vitu taucoko mai oqo na yabaki na nona volitaka voli mai na yagona me rawa ni rau bula tiko kina vakaveitinani.

�Rua ga na tagane ena dua na siga sa rauti au vinaka sara ga oya, ka ni�u qara ga na i sau ni keirau kei na luvequ kei nai sau ni neirau rede ena dua na vula.

�O ira kece na tagane era dau vinakata na veiyacovi, au dau vakarota sara ga vei ira me ra dara na sitokini e na veigauna kece, ka me taqomaki kina na mate dewa ni veiyacovi,� e kaya.

E tomana o Ana ni loloma ka vakasaqara voli ena gauna e se gone kina, e sa qai mai kunea ena gauna e mai veimaliwai kina kei ira na nona i tokani ka ni ra dau veivukei sara vakalevu.

�Kevaka e dua vei keimami e sa levu tiko na nona i lavo, o ya ena kacivi keimami na kena vo me la�ki volia na keimami vakasigalevu, ni sa yakavi mai na vanua, qai sega ni dua e katia vinaka na nona siwa, keimami na dau soli i lavo vakalalai vei koya me rawa ni vukea kina na nona matavuvale.

�Na noqu vakasaqara i lavo tiko qo sa lako vata tale tikoga na noqu dau vakayaloqaqataka tiko na luvequ tagane, me vuli sara vakaukauwa me rawa ni rawata e dua na nona cakacaka vinaka ni oti na nona vuli, ka me rawa ni qaravi keirau vakavinaka.

�Vuqa na gauna e dau mositi au ni dau taroga na luvequ, se�u cakacaka sara tiko mada mai vei?

�Au qai dau tataunaka ga vua me vakagolea ga na nona vakasama e na nona lesoni me rawa ni rawata kina na nona bula mai muri, baleta niu waraka tikoga na noqu cakacaka, ka�u sa taro oti tu kina,� kaya o Ana.

Kuria ni sa nakinaki tiko me na tarova na nona volitaka tiko vakaoqo na yagona ka me sa na vakasaqara mada e dua na cakacaka e na valeniculacula.

More Stories