Adi Vuna mai Taveuni

Listen to this article:

Adi Vuna mai Taveuni

NODA Railesu e na macawa oqo, eda na wilika kina na veisisivi soli e na soqo na ‘Adi Vuna’ ka vakayacori mai Taveuni.

Ni tei wilika sara mada yani na i tukutuku ka a tabaki e na Na i Lalakai e na yabaki 1979:
E na soqo siga tolu ka a vakayacori mai Vuna, Taveuni, e na mua ni Jiulai sa dromu, ka kena i lutua na Veisisivi Adi Dauloloma ni Vuna, era kumuna rawa kina na turaga, marama kei na gone mai kea e dua na i lavo vakaitamera.

A i naki ni soqo ko ya me bokoci kina na dinau ni Valenisoro mai Vuna.

A vakauta mai na kena i tukutuku oqo ko Ioane Veisigisigi, na sekeriteri ni komiti ni soqo kei na valenisoro mai Vuna.

E kaya mai:
A dolavi na soqo e na 10 na kaloko e na mataka ni Lotulevu na i ka 29 ni Jiulai, ka dolava na soqo ni Veisisivi Adi Dauloloma e Vuna, na Turaga vasu ki Vuna, ko Ratu Manasa Leleivono, e na vukuna na Turaga na Tui Cakau.

E a sega ni yaco rawa mai na Gone Turaga na Tui Cakau, e na vuku ni leqa me baleti Adi Laisa Ganilau.

O ira ka ra tiko e na dola ni soqo na Turaga Bete Liu e Vuna (Rev Father Donald) kei na nona i vukevuke (Rev Father Tom Berbrick), na Vuniwai Liu mai Labasa (Dr. Peni Vuiyale) kei ira kece na Turaga ni vanua.

E a vakalolokutaki na siga oqo me baleta na nona bale na marama watidra na Talai Vakacegu (Adi Laisa Ganilau).

A qai tekivu na qito kei na vakatasuasua e na mataka ni siga ka tarava, Vakaraubuka, ka tini na veivakamarautaki vei ira na cauravou kei na goneyalewa e na dua na danisi vakaivua.

E na mataka ni Vakarauwai sa qai vakayacori kina na fainala ni veiqito kece.

Na veisisivi vakaraitaki gone e a qai vakayacori e na 11 na kaloko e na mataka lailai, ka rau vakaitavi kina na Marama Sisita Levu mai Waiyevo kei na dua na Marama Sisita ni Lotu.

E na 3 na kaloko e na yakavi, e sa qai cici mai na qiqi ukutaki, ka sa duatani na osodrigi ni koro mai vei ira na lewe i Taveuni.

Na domo ni kaila kei na qoroqoro, e na levu ni vakalasalasa ka dui yaco tiko e na veimataqali qiqi, e sega ni tukuni rawa.

Ni oti na qiqi ukutaki, sa tekivu sara na meke kei na sere e na gauna ni wili lewe ni Kisi mai na veiwasewase ni qiqi.

Tarava sara oqori na i cocovi ni veiqito, vakaraitaki gone, veisisivi sere kei na meke.

Oti oqori sa kacivaki sara na veitarataravi ni i tutu e ratou sa dui rawata na ranadi e ratou veisisivi tiko.

E vaka oqo na kena veitarataravi, tekivu e ra, ka kauta cake.

A i kalima ko Vosawale Matanababa (Adi Navakawau); ikava ko Ana Racumu (Adi Wairiki); katolu ko Vitalina Lele (Adi Vuna Road); karua ko Akosita Rosa (Adi Kanacea); ka liu me taura na Adi Vuna ko Adi Mere Taufa (Adi Nakorovou).

E a veivakaisalataki na Turaga District Officer e Taveuni ko Tom Cornish, ka solia na bilo siliva na Turaga na Tui Vuna, Ratu Ilaijia Waqa vua na i liuliu ni i wasewase, ka a qaqa e na veisisivi oqo.
Na levu taucoko ni i lavo ka a rawa e na soqo e $1292.47.

A I COVI GADE
Na i covi ka soli vei iratou yadudua e vaka oqo:
Ko Adi Vuna, Adi Mere Taufa, e nona i cocovi me gade macawa dua yani ki Suva.
Ko Akosita Rusa ka i karua e na veisisivi, e sa na gade macawa rua ki Nasavusavu.
Ko Vitalina Lele, ka i katolu e nona i loloma e dua na walesi.
Ko irau na lewe rua, na i ka va kei na i kalima, ko Ana Racumu kei Vosawale Matanababa, e rau a yadua na kaloko ni liga.
E na nodratou veisisivi kumuni sede, e vaka oqo na levu ni lavo e ratou dui rawata:
Adi Mere Taufa (Adi Nakorovou) e $313.74; Akosita Rusa (Adi Kanacea) e $296.37; Ana Racumu (Adi Wairiki) e $202.99; Vosawale Matanababa (Adi Navakawau) e $98.91.
Veivuke mai Waimaqera Esatate $38; Marama Sisita ni valenibula mai Waiyevo e $99; Ratu Mabnasa Leleivono e na nona dolava na soqo e $10.

QITO, MEKE KEI NA SERE
E na qito (soka) e a qaqa kina na Vuna Road, taura na i matai ni i covi, ka druka e na fainala na Nakorovou, ka taura na i karua ni i covi.

E na basiketepolo e a qaqa kina na Nakorovou, ka druka vua e na fainala na Vuna District School, ka taura kina na i karua ni i covi.

E na rakavi e a qaqa kina na Vuna District School, taura kina na i covi.

E na veisisivi meke e a taura kina na i matai ni covi ko Wairiki, ka i karua ko Vuna Road.

E na veisisivi sere, e rau a tai kina ko Wairiki kei na Komiti, ka i karua ko Kanacea.

VAKARAITAKI GONE
E a solia na i cocovi i lavo me baleta na vakaraitaki gone, ka vakaoqo na kena i tuvatuva:
Vula 1 ki na vula 6, liu kina ko Losalini Vanualalala; vula 7 ki na vula 12, liu kina ko Maria Vododuadua; vula 13 ki na vula 18, liu kina ko Ratu Jone Qerawaqa. Era a solia na i covi kece oqo, ko ira na vakabisinisi kei na dau teitei e na yanuyanu oqo ko Taveuni.

KUMUNI SEDE NA GONE
Era a veisisivi kumuni sede na gonevuli ka ratou vakaicovi na lewe tolu ka levu taudua na i lavo e ratou rawata.

E a liu ko Mikaele Vosota No 2, ni kumuna rawa e $20; karua ko Timaima La, e $20; katolu ko Senimili Cautata, $10.

Array
(
    [post_type] => post
    [post_status] => publish
    [orderby] => date
    [order] => DESC
    [update_post_term_cache] => 
    [update_post_meta_cache] => 
    [cache_results] => 
    [category__in] => 1
    [posts_per_page] => 4
    [offset] => 0
    [no_found_rows] => 1
    [date_query] => Array
        (
            [0] => Array
                (
                    [after] => Array
                        (
                            [year] => 2023
                            [month] => 12
                            [day] => 28
                        )

                    [inclusive] => 1
                )

        )

)

No Posts found for specific category