$30,000 nai covi ni qaqa ena Skipper

E RAU na sota tiko o Namosi kei na timi ni Nadroga ena fainala ni 2017 Skipper Cup e Lawaqa Park, Sigatoka ena 3 na kaloko (3:00pm) ena Vakarauwai qo. Na timi e qaqa e na nona tiko e $30,000 kei na timi e druka ena nona e $15,000.

Ia, ena fainala ni Vodafone Vanua Championship, e rau na sota tiko kina na timi veiwekani e rua o Rewa kei Navosa ena ANZ Stadium e Suva rauta na 5 na kaloko (5:00pm). Na timi e qaqa ena nona e $10,000 kei na timi e druka ena nona e $5000.

E rau sa na cabe cake ena yabaki mai oqo na timi ni Rewa kei na timi ni Navosa kina sotasota ni FRU Skipper Cup Premiership ka rau sa na lutu kina Vanua Championship na timi ni Northland kei Macuata.

Ena sotasota ni yabaki 20 ena fainala ni Skipper e rau na fainala tiko kina o Namosi kei Suva ena 1 na kaloko (1:00pm) mai Lawaqa, ia ena Vodafone Vanua e rau na fainala tiko kina na timi ni Ba kei na timi ni Nasinu ena 3 na kaloko (3:00pm) ena ANZ Stadium e Suva.

More Stories