20 na yabaki na mosi ni ulu kei na mata

Update: 10:43AM ENA loma ni 20 vakacaca na yabaki na kena tauvi au tu mai na momosi ni yaloka ni mata kei na vutu ni ulu, au sa dau bese sara ga ni raica na rarama.

Au vakavinavinaka vakalevu ki vua na Kalou Levu ko Jiova e na nona vakayagataka e so na nona i talai, ka solia vei ira na kaukauwa ni veimasulaki me keimami vakabulai kina na tauvimate tu vakaoqo.

E vakamacalataka toka mai o Meiva Lewanikovu mai na koro ko Vanuakula, Nalawa e na yasana o Ra na cakacaka mana e vakayacora vua na Kalou e na kaukauwa ga ni nona vakabauta.

E kaya na marama yabaki 44 oqo ni gauna e sa dau yacovi koya mai kina na mosi ni ulu, e sa dau vinakata me tiko e na vanua butobuto, ka me kakua ni raica na rarama, ka besetaka sara na rogoca na kosakosa.

Ia, e na i ka va ni siga ni vula sa dromu e a qiriti Lekima Lawenitoakula o Lewanikovu, e na nona raica na nona naba ni talevoni ni veimasulaki (Mobile Healing Ministry) e na Na i Lalakai.

E vakamacalataka na marama ni Vanuakula oqo ni vakila sara ga na kaukauwa ni Kalou e na gauna e masulaki oti kina ni vaka e taluva ga mai vakasauri na i colacola bibi ka kabiti koya voli tiko.

E kaya na marama oya ni vakavinavinakataka vakalevu na noda Kalou levu e na nona vakadeitaka tiko na nona vakabauta me cakacakataka, ka me rawa kina na bula.

Sa nuitaka tiko na marama oqo ni na vakabalavutaki tiko na nona bula o Lawenitoakula kei na nona matavuvale, ka me rawa ni toso vinaka tikoga na nona veimasulaki, me rawa ni da vukei kina na lewe i Viti raraba.

More Stories