12 ena bogi

?NA GAUNA o ni se qai dre vakavinaka kina na nomuni i tutuvi, ka vakamalekata na tatagi ni nomuni kedru e na i golegole ki na yanuyanu o Moce, keimami sa vakavakarau na lewe ni koro o Matawailevu e na neimami vakasosolotaka na neimami i voli me keimami taubaletaka sobu yani ki Sawanikula, e na kena la?ki waraki na keria.?

Oqori na i vakamacala e cauraka toka mai o Samu Turagalailai na turaganikoro ko Matawailevu e na Tikina o Noimalu, e na yasana o Naitasiri.

E kaya o Turagalailai ni qai rauta na veimama ni 11 ki na 12 na kaloko e na bogi levu ni siga Vakaraubuka, era sa dau vakarautaka na nodra i voli me vakavodoki yani ki na nodra ose, ka so era waqadomo taka sobu na lewe ni koro, ni se bera ni kida na mataka.

Kuria o Turagalailai ni i voli oqo e okati kina na yaqona, na dalo kei na kakana draudrau e na kena vakarautaki yani me kau ki na makete e Suva.

Tomana ni dau ya $12 na nodra i vodovodo e na keria (dua na tamata), ka qai $2 na i sau ni dua na i vutu dalo se yaqona, kevaka e taga yaqona e na ciciva sara toka yani na $10, dua.

E kaya na turaga yabaki 35 oqo ni sa dua dina na gauna dredre era sotava tiko na nona lewe ni koro, ia, e vakavinavinaka vakalevu ki vei ira na lewe ni tikina o Noimalu e na nodra sa duavata e na sasaga yaga ni gaunisala, ka sa tekivu laurai na vakavatukana e na macawa sa oti.

Tomana o Turagalailai ni rauta ni 22 na vale e tiko e na nodratou koro, ka 100 vakacaca na lewe ni koro era vakatawana tiko na dela ni yavu.

?Keimami dau solesolevaki e na veisiga, oya e na neimami dau tea e 500 na yaqona se dalo me nona vakatabakidua e dua na turaga e na mataka lailai, ka la?ki tomani tale e 500 ki na dua tale na turaga e na kena yakavi.

?Keimami dui vakasigalevu ga e na neimami dui vale ni bera ni la?ki tomani tale na teitei e na kena yakavi.

?E tautauvata o ya ni keimami tea e 1000 na yaqona se 1000 na dalo me nodrau e lewe rua na turaga e na dua na siga,? e kaya.

Tomana o Turagalailai ni nodratou koro, e ratou dau qai gunu yaqona ga e na mua ni macawa, ka vakatatabu mai na siga Moniti me yacova na siga Lotulevu.

Sa kerekere raraba tu ga o Turagalailai ki na matanitu ke rawa ni bau veivuke yani e na kena vakarawarawataki na nodra gaunisala, ka sa yaco sara tikoga e na koro ko Narokorokoyawa e na gauna oqo.

More Stories