Update: 11:08AM ENA macawa oqo, e levu tiko na i talanoa ni qaqa kei na cakacaka vakaukauwa ko ni na wilika tiko na noda ko ni dau taleitaka na noda i tabe ena veimacawa.
E na Tabana e 4, e talanoataki tiko kina na nodratou sasaga na lewe ni co-operative me cicivaki na bisinisi ni tekisi ena noda vanua, ka sa dua na tabana e sa taladrodro sara tiko ena gauna oqo na Veivueti Taxi Co-operative Ltd.
E da wilika, ka vakadinadinataka ni sega ni dua na ka e tautauvata kei na cakacaka vakaukauwa ena yalo dina kei na cakacaka vakadodonu.
Era sa vakadinadinataka tiko na noda ni sega ni dua na ka e dredre, kevaka eda na gugumatua ena caka vinaka ka vakanamata na noda rai ki na takete eda na sasaga kina, eda na rawata dina ga.
E vica na i talanoa esa tabaki oti ka dau nanuma tu na tabana oqo me dau veivakauqeti vei kemuni na wekada ena vuku ni vakacicivaki bisinisi, se na kena vakayagataki vakayalomatua na noda i yau bula, na taledi.
Ni sa tikoga na yalomatua kei na cakacaka vakaukauwa, ena levu sara na veika vinaka eda na rawata kina.
E dua talega na ka e da dau malumalumu kina, oya na kena vakayagataki na gauna.
Na kena tuvani vakamatau na cakacakataki ni gauna kei na i tuvatuva cava ko sa tuvana mo na rawata ena loma ni dua na siga, loma ni dua na macawa, se ena loma ni dua na vula.
E ka bibi kina, me dau tiko na tatadra, kei na kena cakacakataki na veika me rawati kina na tatadra oya.
E levu na wekada era sega sara ni vuli vinaka, era gumatua na tei yaqona se na dalo, era sa rawata tu e sagavulu na udolu.
Oya na cakacaka vakaukauwa kei na gugumatua.
Eda na sega ni rawa ni da tatadra wale tu ga, ka sega ni cakava kina e dua na ka.
Vei kemuni na wekada ko ni tiko ena vanua e levu kina na nomuni qele, e sa tu saraga e ligamuni na kena cakacakataki na qele oqori me rawa mai kina na nomuni bula, na bula kei na toroicake ni vuvale.
Kevaka esa na sega ni cakacakataki na i yaubula oqori, e sa qai mai maumau wale tu, baleta ni da itaukei ni qele ka sega ni tiko vei keda na kena vakasama se me vakatoroicaketaki vakacava me rawa mai kina na i vurevure ni bula.
Na kena vakasama kei na kena cakacakataki ena rawa ga mai, kevaka walega ko na kerea na yalomatua kei na vuku e solia duadua ga na i taukei ni bula.
Na kena cakacakataki na taledi, meda rai ga vei ira na noda cauravou era rawata mai na koula mai Rio ena 2016.
Na i matai ni koula e rawata o Viti, mai na qito rakavi leyavitu.
E dina ni tu vei ira na veitimi lelevu e vuravura na i yau, na misini lelevu era terenitaki kina, kei na nodra vakarautaki vakavinaka ena i vakatagedegede era kila ga na kena dau, ia eratou vakaraitaka na noda cauravou ni taledi kei na nodratu tuberi vinaka mai vei iratou o Ben Ryan kei na ivakailesilesi ni qito e rawati kina na koula.
Eda rogoca talega ena macawa oqo ni sa curu na yacai Waisale Serevi ena Multi Ethnic Hall of Fame mai Amerika.
Oya esa dua na cavuisausau eda qoro kina na lewei Viti. Baleta ni ra cakacakataka ka cakacaka vakaukauwa ena taledi e soli vei ira.
E sega ni dua na i ulubale ka me kua na vakaiulubale kevaka ko na vinakata mo na rawata e dua na ka vinaka.
Ena so na gauna ko na sotava na dredre, ko na rogo vosa beka, ia mo na dei tikoga ena nomu segata mo na rawata na veika vinaka ko tatadrataka ni ko na yacova.
Esa vakanuinui tu ni dua na macawa ni qaqa na macawa oqo.
