Yaco na leqa

ENA sigalevu nikua e sa na qai macala mai kina na nodratou vakatulewa na Fiji Rugby Union se o cei na timi me rau na fainala vata kei na timi ni Cakaudrove e Lawaqa Park e na siga Vakarauwai oqo, ni bera ni rau veitavulaki na timi ni Suva kei na timi qaqa ni Nadroga.

Na vuna e na nodratou vakatutu na timi ni Handy Finance Naitasiri Bulls ni lewe levu vei ratou na qito tiko e na timi ni Malolo e ra sega ni rejisita tu kina.

E kaya na vunivola o John Kaisuva ni ratou se biuta sara na nodratou i vola ni kudru ki na Fiji Rugby Union e na siga Moniti, ka sa qai waraki tiko o ratou na i vakalesilesi ni timi ni Malolo me ratou kauta mai na nodratou yasana ni talanoa.

Tomana o Kaisuva ni so vei ira na i lala qito tiko oya era sega madaga ni bau qito tu mai ena dua na kalavo, ka sega talega ni rejisitataki tu e na dua na kalavo se Unioni, ka ra sa mai qito sara e na siga Vakarauwai.

Na i walewale ni qito vaqo e na sega ni tubu kina na noda rakavi e na noda vanua, ka vakabibi ni sagai tiko madaga qo na toso ki na i vakatagedegede e caka e kaya.

E dua na sota warumisa e rau a cakava na timi e rua oqo mai na Lawaqa Park e na siga Vakarauwai e na semi-fainala ni B Division e na macawa sa oti.

Na nodratou liu toka e na i matai ni veimama na timi ni Malolo e vakavu mai na dua na sikoa mai vua na nodratou wigi o Nacanieli Labalaba kei na rua na i caqe ni Koloni e samuraka na fullback o Tevita Tavuto ka kauta cake na kedratou kai ki na 11 kei 7.

Ni qai tekivu ga na i karua ni veimama, vaka ga e soli tale e dua na i cegu vou vei ratou na timi ni Bulls e na nodratou veimuri na i yatu e liu ka qai laki soli sara na polo vua na nodratou fullback o Vetaia Rokosuka ka kauta cake na kai e na kai e 11 kei 7.

Na timi ni Malolo e rau liutaka tiko e rua ka rau sa bau matataki Viti talega e na qito rakavi oya, o Mosese Volavola vata kei Jonetani Ratu, ka veivuke sara vakalevu e na nodratou qaqa vei Naitasiri Northern Bulls e na Vakarauwai.

Era osodrigi toka na veitokoni e na timi ni Bulls, ia, e dreve na nodratou i naki ni sa bau tataqomaki vinaka saraga na timi ni Malolo e na vei gauna kece e ratou saga kina na laini ni sikoa.

Na kaukauwa ni veisamuraki e rau cakava na timi e rua oqo e vakavuna na kena soli me rau yadua na tiki ni veva damudamu o Iliavi Vadrawale (6) mai na timi ni Malolo vata kei Jone Naucabalavu (18) ka vei sosomitaki e na i karua ni veimama mai na timi ni Naitasiri Bulls, e na vuku ni nodrau a veibutu e loma ni rara.

Ni voleka ni mai cava na qito e qai gutuwa taka tale na polo o Labalaba me tabaka ki na na i karua ni nodratou sikoa, caqeti curu ka kauta sara na kedratou ki na 19 kei na rua na i totogi e caqeta curu o Vetaia me kauta cake ki na 13.