Wainigunu mai Namara

Update: 11:07AM E RAUTA ni 27 na vale mai na koro e Matamaivere e Namara, ena yasana o Tailevu era sa vukei ena kena vakadrodroi na medra wai ni gunu.

Esa vakavinavinakataka na i tuvatuva kei na veivuke oqo mai na Tabana ni wai ni noda vanua na turaganikoro o Emosi Waqairavoka.

Na koro oqo o Matamaivere e tiko ena i tuvatuva ni kena vukei na veitikotiko kei na veikoro ena loma ni tuvatuva ena yabaki 2017 kei na 2018.

Tukuna ni ra veivuke saraga na lewenikoro ena nodratou veiqaravi na Tabana ni Wai, ka taura ga e tolu na macawa na nodra qarava na i tuvatuva oqo.

E liu ni sebera ni caka na i tuvatuva oqo e ra dau vakayagataka tu e rauta ni 147 na turaga, na marama kei na gone e dua na tobu me caka kina na sisili kei na savasava.

Na i tuvatuva e vakayacora oqo na Tabana ni Wai, oya na kena vakadrodroi na medra wai ni gunu mai na wai ni uca na lewenikoro e Matamaivere.