Vuli tara ni se qai fomu 4 e Navuakece

E SEGA ni rawa ni da vuniwai kece, se qasenivuli taucoko, se cava tale na cakacaka eda kitaka e na dela ni vuravura qo, esa tikoga na noda dui taledi, ka sa qai vo ga mo cakacakataka e na yalomu dina.

Oqori na veimala ni vosa e cauraka mai o Sikeli Veitala na turaga ka sa vuqa sara na veivanua e na noda Viti, e sa vakalakova e na tabana ni tara vale.

E kaya o Veitala ni o koya e vuli me yacova ga na fomu 4, ia, na nona guta me kila na tara vale, e yavutaki sara ga mai e na nona vuli tara, ka sega tale ni dua na koronivuli e vuli kina, ka kena i kuri ga na nona vakararavitaka na nona bula ki vua na Daunilewa.

Me yacova mai na gauna oqo, e sa wavokita vakavinaka na noda Viti na turaga oqo e na vuku ni tara vale.

Tomana ni sa yaco sara ki Yasawa, na veikorokoro e na wasewase e loma kei na loma ni colo kei Naitasiri.

“Na noqu jaji, e na vakatau ga mai na levu (size), ni vale au tara.

“Me yacova mai na gauna oqo, au raica ga na vale, au sa kila sara na i yaya kece e gadrevi kina,” kaya o Veitala.

Tomana na turaga yabaki 34 oqo, ni e na vula ko Noveba ni yabaki ga oqo, e sa na cegu kina na nona taura tu na i tutu ni turagani koro mai na nona koro ko Waisa, Navuakece, e na yasana ko Naitasiri, ni sa oti vakavinaka oqo e 4 na yabaki na nona taura tiko mai.

Kuria ni gauna ga e sa na cegu kina mai turaga ni koro, e sa na qai tomana tale na nona tara vale me rawa ni qaravi rau vakavinaka kina na nona veitinani.

Sa nona i vakasala ga o Veitala vei kemuni na cauravou gone ko ni sega ni rawata vakavinaka na nomuni vuli, ni kakua ni yalo lailai, ni cakacakataka na taledi e tiko oqori vei kemuni me rawa ni ko ni kunea kina na veika vinaka e na veisiga ni mataka.