Vucu ni gauna ni veika e na yaco

E KOTO oqo era e dua na vucu ni gauna se Lawata ni gauna ka vakaraitaka mai o Timoci Nacola mai Bucalevu, Nakorotubu ena yasana o Ra ka kainaka ni a se talanotaki makawa sara nai tukutuku e koto kina ka waraka tale tu ga na kena dela ni gauna.

E so na tukutuku e tiko e na loma ni qaqa ni vucu qo esa yaco oti, eso esa yaco sara tikoga qo ia e vica na kena i wase esa waraka tikoga na kena dela ni gauna me na qai yaco dina kina. Ni tei wilika sara yani:

Au sa kacivi ena siga nikua

E kacivi au na Kalou bula

Meu duri cake vakamalua

Ni sa soli mai na kaukauwa

Na i titoko au via tukuna

Me kilai tu e Viti nikua

Nai titoko ni Kalou bula

Ai solisoli mai na ulunivanua

Na i titoko au via sereka

Sa yali dede sara vei keda

Kai valagi era vakaleleca

Kena i cili tu na veiotela

Na saravanua era vakadikeva

Kena mana era via taukena

Sa muri ira tu na kena leqa

Bisovi ni ra masu vata

Ra masuti koya noda turaga

Ni sa levu nodra tiko veivala

Vakadavedra levu ra cakava

Ra mate vakayauyau na tamata

Sevi ni lavo sa mai lala

Na kava ni benu era valataka

Sa sese tu na vakasama

Sa lialiaci tiko na lomadra

Peritania sa dredrevaka

Nai lavo levu esa rawata

Me baleta tu na koco ni lomadra

Nai titoko ni ra via sarava

Ni ra via kauta tu na kena mana

E vakauqeti tu na gata

Vakavuna nodra tiko veivala

Nodra i lavo esa tayana

Na buli ni yaragi ra sa cakava

Beqaravu levu sa qai caka

Igiladi qo ni qai vakasala

Ni vakarorogo kece na wekada

Vanua ko Viti meu tukuna mada

Niu sa raica oti tu ena tadra

Na cudru ni Kalou da mai sotava

Ni da mai sarava na titoko mana

Na bure kalou ni da mai dolava

Au raica au sa rerevaka

O Viti nai tutu ni yavana

Na vanua oqo e vanua ni mana

Era masu rogoci na kena tamata

Sa soli oti na nodra tu galala

Suka nodra qele kei na wasawasa

Na kena lewa me koto e ligadra

Ni rogoca na lewei vuravura

Sa yaco na lewa mai Uluda

Na i keli levu sa mai suka

Suka lesu tale i nona vanua

Kalokalo levu e mai kauta

Mo laveta na nomu i vukavuka

Ka totolo sara ki na nomu vanua

Mo sa vuka cake vakamalua

Mo sivita na sala ni waqavuka

Mo vakairova na noda vuravura

Ka curuma tu na o vulavula

Berabera tu na gasau vuka

Ka yacova mai na tinikarua

Kalokalo levu tu vakadua

E dusia tu na ulunivanua

Sai koya oqo na noda vanua

Me sa lutu sobu vakamalua

Nai vola oqori mo laki biuta

Mo vakacuruma kina vale koula

Na noqu tamata me ra qai basuka

Me ra raica na noqu i tuvatuva

Sai koya oqori na i sala ni bula

E bose na lewe i vuravura

Na bete ni Kalou ra mai curuma

Nai tukutuku ra mai tukuna

Na i keli levu sa mai vuka

Sa biuta oti na noda vanua

Na noda i lavo a sa kauta

Kauta vata na i vola ni gauna

Ni ra sa nanuma na nodra vanua

Sa yaco ni ra tiko bobula

E tarava mai na dravudravua

Sa kidacala tiko na lomadra

Na veivosaki esa katakata

Voleka tu na veitaratara

Veibeitaki ra sa cakava

Itala qo me tarogi mada

Na i titoko, i keli sere vakacava

Ni loka na yavana kei na ligana

Sogoti tu na kena matamata

Era yadrava tiko na nona tamata

Na taro oqo me saumi mada

Itala qo ni vosa qai kaya

Na taro oqori meu sauma mada

Au sega ni kila ni dua noqu cala

Na noqu i tavi au sa cakava

Na noqu sotia veisau yadra

Na ki ni loka tiko e ligadra

Sa yaco na lewa ni turaga

Uneune levu esa cakava

Tibi na liva kei na yasayasa

Era bale sobu na noqu tamata

Sa yaco duadua na lomana

Me rau sereki na nona tamata

Vu mai Idia vosa qai kaya

Vanua ko Viti au kila vinaka

Ni ra tiko kina na noqu tamata

Bisinisi lelevu era dui cakava

Au vakatura tiko e matada

Vanua ko Viti me valuti mada

Ni vanua lailai wale sara

Sega ni dede sa waicala

Au sa kerea tiko e matada

Me ra toki rawa na noqu tamata

Nai valu oqo me na qai caka

Isireli qo ni vosa qai tukuna

Ni rogoca na lewe i vuravura

Noqu taro mo dou na sauma

Nai yaragi cava dou na kauta

Ko ni bera kece na veivanua

Ni rogoca meu tukuna

Ni caka oti na noqu valuta

Na gasau vuka au vakatubura

Me waicala kina na nodra vanua

E bokoci mai Ulunivanua

Ai e dua na waqavuka

Na bomu lelevu esa kauta

Me vakarusa na ulunivanua

Yali vakatawamacala tiko ena siga nikua

Isireli qo ni vosa qai kaya

Vu mai Idia rogoca vinaka

O vuravura au vakasarava

Na nomu yaragi e sega ni yaga

Vanua ko Viti ko sega ni rawata

Oqori na tagane mai na buca ni vala

Ke bilioni na nomu tamata

Mo kauti ira kina buca ni vala

Tolu walega e ratou qarava

Nai yaragi e ratou kolotaka

Era dravusa kece na nomu tamata

Bau talega na wasawasa

Na bose oqo esa tayana

Na veilecalecavi era sa cakava

Na bose oqo e sega ni cava

Ni ra curu ki tuba na kena tamata

Na vosa ni bole ra kailavaka

Na nomu vanua au na kabata

Waqavuka kei na waqa ni vala

Ka bula e vanua mamaca

Me yacova na nomu yalayala

Na vosa ni veibeci ko cakava

Ko cei na tagane me na qai macala

Au sa wirica na kena madigi

Me raici lesu tal tu ko Viti

Ota ni Kalou sa mai lili

Nai toko nai keli me rau kacivi

Ni wawa tiko ko i rau na Ciri

Me rau vodoka na sala miniti

Me kele mai Nadi ni bera na tini

Ni wawa tiko na Bose ko Viti

Me rau vosa kina ko i rau na Ciri

Ni bilioni nai lavo kei Viti

Me duri kina nodra veibisinisi

Dua na sitoa me vakacicivi

Me nodra sitoa tu na kai Viti

Bose ni vanua sa kacivaki

Na lewe i Viti meda soqo yani

Rau curu mai na gone lomani

Rau tiko mai na vanua tani

E kacivi rau na luvena ni lami

Ni wawa tu ko Viti Ailadi

Me ra mai rogoca na nona I naki

Noqu sevi levu me na qai dolavi

Na veiyavusa me ra cokonaki

Nodra bisinisi me tauyavutaki

Na noqu gauna me sa dolavi

Noqu agilosi veivalivali

Era talai tiko mai lomalagi

Me ra mai yadra na noqu i naki

Sa tabu kina na cici lawaki

Politiki oqori mo biuta tani

Oqori na qito nei Setani

Era qito kina na vavalagi

Turaga kece ra lewena yani

Mana ni vanua sa mai yali

Dua na waqa kena kavetani

Na yacana tu na Viti Kabani

Waqa ni yau mai lomalagi

Na kena sevi kece era lokataki

Baqe kei Viti ki vavalagi

Na ki ni loka era tiko tani

Sogoti tiko mai lomalagi

Waraka tiko na rua na yabaki

Me meria tu na drodrolagi

Me luvuci tu na Viti Kabani

E luvuci mai e na Joritani

Noqu ruve vula lutu mai lagi

Noda yavutu me mai tabaki

Sa i koya oqori na yaca lomani

Na Turaga kece mera saini yani

Ra lewena tu na Viti Kabani

Noda sevi levu sa na qai dolavi

Na kalokalo levu meu tukuna mada

Mai Natuicake ena gauna makawa

E kauti ira na i vakatawa

E Peceliema vakaraitaka

Ni sa sucu mai na vu ni Rarama

Yabaki ciwa va ra qai yavalata

Vanua o Viti me yadrati mada

Me yadrati mada na kena tuwawa

Nona moce tiko sa rui yawa

Latest posts

More Stories