Vosoti na kelikeli

E VAKAVINAVINAKATAKA tiko na matanitu oqo o Akesa Ganova ena veivuke levu e sa cakava tiko e na nodratou koro o Naloto mai na tikina o Verata Ucunivanua e na gauna oqo.

Oqo e na kena soli yani na paipo ni wai ka mera qai veivuke na lewe ni koro e na kena keli mai na vanua e ciciva na paipo me yaco sara ki na nodratou koro.

Tomana o Ganova ni ra sega saraga ni qai laki basa na marama se gole i wai na turaga kei ira na cauravou e na nodra saga tiko me yaco i nodra koro na kelikeli ka caka tiko mai oya.

Na i vakasoso ni wai e tekivu sara mai Daviko (Waidalice) ka qai takosova mai na veitokaitua kei na vei delana, ia na kena dredre gona e vakavuna na kena se bera ni yaco e nakoro e na gauna oqo.

Kuria ni sa oti oqo e 20 vakacaca na yabaki e na nodra gunu tu ga e na toevu, ka sa dua na veivuke levu kevaka e sa na yaco e na koro na wai savasava e na vukuga ni tiko bulabula.

Keimami dau vakasaqara na kedra na turaga e na veisiga, oya me tekivu saraga e na katalau, vakasigalevu kei na vakayakavi ka wili talega kina na medra yaqona e kaya.

E kaya ni o ratou kece na Mataqali Saraviti, Tunidau, Tuvaleni, Vosaratu, Rokotakala, Sauturaga kei na Gonenaloto era veitauriligataka kece na nodra vakani na nodra turaga.

Tomana o Aveuta Kubou na turaga yabaki 69 ni koro ko Naloto ni sa vovoleka sara ni yaco e na koro na wai ka sa qai vo tikoga oqo me ra kelia na paipo me cowiritaka e dua na delana levu me rawa ni qai drodro sara mai na wai e na koro.

Kaya o Kubou ni gauna sa drodro mai kina na wai, e a qai mai tao sara ga e na delana levu oya, ka so vei ira na cauravou era sa via vakasuka, sa qai kerea o koya mera vosota ga vakalailai, baleta me ra nanuma tiko na nodra kawa mai muri. Sa ra mani lomavata tale na turaga kei na cauravou mera vosota talega vakalailai me rawa ni yaco sara ki na koro na wai.

Ia, e na gauna oqo era dau solia tiko e a $1 na dola ki koronivuli me veivuke e na i sau ni livaliva e na kena pamutaki mai kina na nodra wai ni gunu kei na kana ena kena qivai (borehole) mai loma ni qele me kauta cake mai ki na tani ka toka e cake.

Erau sa vakavinavinaka ga vakalevu e na veivuke vakaitamera e solia tiko vei ratou na matanitu, ka ratou niuitaka ni na sega ni oti me yacova ni sa yaco na wai ki nodratou koro.

More Stories