Vosa bubului

Update: 8:31AM A MAI vosa bubuluitaki ena yakavi ni Moniti na i liuliu ni soqosoqo na FijiFirst, ko Josaia Voreqe Bainimarama, ka ai ka ono ni Paraiminisita ka digitaki mai vei ira na lewenivanua e matadra na Peresitedi ni noda matanitu o Ratu Epeli Ganilau e na nodra i tikotiko e Vale Levu e Suva.

Oqori ni oti na nodra mai rawata na lagilagi na nodra i soqosoqo ena veidigidigi levu ka vakayacori e na macawa sa oti.

A mai rawata na nona i sqosoqo e 293,714 na digidigi mai na 496,364 taucoko ni digidigi e a mai kumuni rawa e na veidigidigi e nai ka 17 ni Seviteba, ka rawata taudua o Bainimarama e 202,459 na digidigi.

A via vaka koto oqo na qaqa ni nona vosa bubului e na i vakadewa vaka Viti ne: Ko i au ko Voreqe Bainimarama, kau sa vosa bubului oqo niu na dina ka dei ki na Matanitu Vakaripabuliki o Viti me vaka e virikotori e na lawa kau na dau muria, taqomaka ka maroroya deivaki na Yavu ni Vakavulewa ni Ripabuliki kei Viti. E na veika oqo sa kerei kina na nomuni veivuke na Kalou.

Me vaka na Tikina e 93(2) ni Yavu ni Vakavulewa ni 2013, a vosa bubuluitaki o Bainimarama e na nona digitaki mai vei ira na lewenivanua me Paraiminisita me vaka ni ai liuliu ni soqosoqo vakapolitiki ka a rawata e sivia na 50 na pasede na i wiliwili taucoko ni dabedabe ni palimedi.

E na mai vakaduria na nona Bose Yaco e na nona na lesu mai e na United National General Assembly mai New York, Mereke.

A rawata na FijiFirst e 32 na i dabedabe, 15 e rawata na Social Democratic Liberal Party (SODELPA) kei na National Federation Party (NFP) e 3 na i dabedabe e na veidigidigi levu ni 2014.

Era a vakadinadinataka na vosa bubului oqo ko ira na mata ni Matanitu tani e na noda vanua, o ira na turaganivalu ni noda liga ni wau kei ira na vulagi sureti.

E a tiko talega na marama watina o Mary kei na lewe ni nona matavuvale.

Ko ira na Paraiminisita e liu ka ra a digitaki e na veidigidigi vakalawa e oka kina o Ratu Sir Kamisese Mara, Dr. Timoci Bavadra, Sitiveni Rabuka, Mahendra Chaudhry kei Laisenia Qarase.