Voleka ni daro na sota

Update: 10:07AM E A mai voleka ni mai daro na nodrau qito na timi ni BLK Nadroga kei na Manubhai Suva ena Vakarauwai sa oti ena rara mai Lawaqa.

Oqori e vu mai nodra veitokoni na veiliutaki ni unioni ni Nadroga vua na timi ni Malolo ena nona sega ni qito o Malolo ena fainala ni vakatagedegede na Ba Division.

Tukuna na petereni ni Unioni ni Nadroga o Ratu Aisea Waka Volavola ni dodonu me dau vakatulewa vakadodonu na Fiji Rugby Union.

O iratou na cauravou ni Nadroga eratou qito tiko ena Malolo sa ratou vakamuria vakadodonu taucoko na ka e dodonu me caka ni bera ni ratou laki qito tale kina dua na unioni.

E tolu na siga nodratou tiko mai Suva na i vakailesilesi ni Malolo kei na Turaga na Tui Lawa ena nodratou saga me ratou veisautaka na FRU na nodratou vakatulewa.

Ia ni sa sega ga ni veisau na vakatulewa koya, keimami sa mani nanuma kina me kua ni caka na qito kei Suva ka kena i kuri oqori ni se vo tiko me sauma mai vakaoti na FRU e so nai lavo kina Unioni ni Nadroga, tukuna o Ratu Waka.

Nisa vakasavui na i tukutuku vei ira na cauravou ni Nadroga ni sa sega ni caka na qito, era sa veisau sara ka so era sa biuta sara ga na keba e Talenavuruvuru mera laki gunu yaqona.

Ia vei ira na gole yani ki sara qito era kurabui ni sa tukuni nisa sega ni caka na qito, so era vosavosa ni lusi nodra i vodovodo ni tolili ka levu ga na dau veitokoni yalo dina era duri tu e yasa ni bai e tuba.

E tukuna o Bob Moore e dua na turaga saravanua mai Ositerelia kasa dara tu na i seqeleti ni Nadroga nona rarawa ni sa mai daro na qito.

Au tu mai Serene, au dau rogoca tu ga na timi ni Nadroga, noqu gade mai oqo e Viti au via mai saravi iratou sara ga ia kena seva ni sa sega ni caka na qito au sa lesu tale ki na Otela, tukuna na turaga ni Ositerelia oqo.

Ia ea qai dua tale na veivosaki ea caka me mai wali kina na leqa oqo ka da dau kilai tani kina na kawa i Taukei ea qai curu e loma oya ka mani lewai tale kina mesa na caka ga na qito.

Ea qai ia na veiqiriyaki mera lesu tale yani na vica na cauravou era sa gole ki tuba, ena gauna vata oqori na timi ni Suva esa vakaukauwa yago tiko mai kina e na rara e Lawaqa nisa vo e tinikalima na miniti me tekivu na qito.

Tukuna o manidia ni Nadroga Iliavi Kato nisa viriviritaki ga vei ira na cauravou na i siqeleti ka tukuni mera vakusakusa de qai kauta o Suva na bilo na Farebrother kevaka eratou bera i loma ni rara.

O Nadroga e sega tale ni qai va katakata, e biubiu tu ga yani e Talenavuruvuru vakadua i loma ni gym, vica ga na miniti na vakadre ni masela ka ra curu sara yani e loma ni rara, lagati na sere ni matanitu, tekivu sara na qito, tukuna o Kato.

Ena gauna vata oqori sa ra tabili tale mai ki loma ni rara o ira na sa laki wawa tolili tu mera lesu tale ki vale

Au vakavinavinaka vei ira na cauravou yadudua ni Nadroga ena yalo ni vakarorogo e tiko vei ira kei na cakacaka vata baleta na vica na miniti oya, e vica na miniti dredre dina, kuria o Kato.

E saga na i Lalakai me dua mai na nona i tukutuku na CEO  ni FRU e taqiri lala tu ga nona talevoni veikauyaki ni qiriti vakatolu.