Viribai rawa na Ose

Update: 10:10AM E KAYA na manidia ni timi ni Nadroga o Iliavi Kato ni ratou sa tu vakarau tu me ratou na taqomaka tale na bilo na HFC Bank Farebrother vua na timi ni Handy Finance Naitasiri North Bulls ena Vakarauwai oqo ena rara e Lawaqa.

Na Naitasiri North Bulls ea qaqa ena fainala ni B Division vua na timi ni Cakaudrove ena 18 kei 5 ka vakayacori tale ga e Lawaqa na qito oqori.

Tukuna o Kato dina ni qai basika tale mai na yaca oqo na Naitasiri North ena dua na gauna balavu, eratou sega ni vou ena buturara ni rakavi e noda vanua.

Na timi oqo era sa basika mai kina e levu na yaca rogo ni rakavi e Viti me vakataki Ilaitia Tuisese, Nasoni Uluvula, Rusiate Namoro, Talatala Joji Rinakama Nasoni Roko kei na vuqa tale.

Era sega ni vulagi ena kena qitotaki na bilo cecere ni rakavi e noda vanua ka tiko tale ga vei ira e so na mona vuku ni qito oqo na rakavi me vakataki Manasa Radrotini kei Talatala Rinakama ka kena i kuri oqori ni oqo e timi ni vanua.

O Nadroga e doka na timi oqo me vaka nona dau dokai ira kece na timi era gole mai Lawaqa ka na sega nina vakaweleweletaka na qito ena Vakarauwai oqo, tukuna o Kato.

Kuria ka kaya ni sa oti oqo e tolu na kena mai bolei na Farebrother ka mavoa levu ga e tiko oya o Rupeni Nasiga ena yavana ka na sega ni qito tiko ena vica na macawa mai oqo.

Ia, vei ira na vo ni cauravou, dina e tu e so na mavoa lalai ia na yalo ni valataki bilo na Farebrother e sebera ni veisau vakadua me tekivu mai ena i matai ni bolebole, tukuna o Kato.

E sa veisureti tu vei kemuni na dau ni veitokoni ena timi ruarua moni gole yani e na rara e Ra Sports Ground ena Vakarauwai oqo.

Latest posts

More Stories