Veivuke o Veremo ki na nona matavuvale ena masi vava

KEVAKA e dua e vunautaka wavoki tiko ni sa sega na cakacaka e na gauna oqo, au vinakata me?u vakadeitaka ni oqori e dua na i tukutuku lasutaki ka macawa wale tu ga.

E cauraka mai na veimala ni vosa oqori ki na noda niusiveva oqo na i Taukei o Timoci Veremo e dua na turaga dau masi vava, ka dau dabe toka e na i curucuru, e na Queensland Arcade e Suva.

E kaya na turaga yabaki 49 oqo ni cakacaka e bini kasaura tu e na noda vanua, ia, sa vo ga meda vaqara, ka cakacakataka sara e na kena veta duadua e cake.

?Au a tekivu masi vava mai ni se bera mada ga niu vakawati.

?Na gauna oqo e sa yabaki 29 tale na noqu ulumatua ka sa soko tale tiko e na waqa ni qoli.

?Me tekivu mai na nodrau vuli na luvequ yacova mai ni rau sa cakacaka ruarua tale oqo, na i lavo keitou bula mai kina e rawati ga mai e na noqu masi vava,? kaya o Veremo.

Tomana e na nona tukuna ni rairai e so beka na tamata era tukuna ni cakacaka beci, ia, vei koya ke sa bula mai kina na nona matavuvale, e sega ni mai milamila sara ga kina vakalailai e dua na vuti ni yagona e na nodra vakalelewa na so.

?Vinaka cake mo masi vava e veisiga mai na veimurimuri wavoki tu ga e lomai Suva, ka tini sara e na butako, ka gole sara yani ki valeniveivesu.

?Qo o dadabe toka ga ka waraka me ra yaco yani na lewe ni vanua, ka ra vinakata me masi na nodra i vava, ka sega ni o vaqarai ira wavoki tale,? kaya o Veremo.

Kuria na turaga oqo ni lavo kece e rawata mai e na nona masi vava e vakayagataki sara ga e na nodratou bula ni vuvale, saumi ni livaliva, na wai kei na kakana e na dela ni teveli.

?Au dau tekivu e na 6 na kaloko e na mataka lailai, ka qai dau cegu e na 2 na kaloko e na veiyakavi.

?E liu se dau katia vinaka sara ga, ka rawa niu rawata kina e $50 na dola mai na loma ni walu na auwa, ka?u vakamacalataka no oqori e cake.

?Ia, na gauna oqo e vaka me sa lutu na i lavo au rawata kina, ka?u vakavinavinaka tikoga vei ira na dau mai masi tiko na nodra i vava ni i lavo era solia tiko vei au e sa la?ki rawa tiko kina na bula,? kaya o Veremo.

Sa nona i vakasala ga o Veremo vei ira na vaqara cakacaka tiko e na gauna oqo, me ra kakua ni madualaka na mataqali cakacaka cava ga era sotakaya, baleta ni sa rawa kina na bula, ka vinaka cake sara mai na veimurimuri sega na betena ka vuqa na cauravou bulabula vinaka era sa matanataka sara tikoga e na gauna oqo.