Veitarogi Vanua

Ena macawa qo eda na wilika kina na ivakamacala ni Valenivolavola ni Veitarogivanua me baleta na Qele Vakawa. Qo e dua na ulutaga e gadreva na Tabacakacaka iTaukei me veivakararamataki kina vakabibi ni dau levu era dau vakataroga.

Na Qele Vakawa e yacana vakaVeitarogivanua, e vakatokai vakavalagi me ?agnate descendant?. Na qele qo e levu na yacana ena veiyasai Viti, ka dau sema vakavoleka ena ivakarau vakavanua. Ena so na vanua e yacana na iVetiveti ni Lou se iCovi ni Draudrau, ena so tale na vanua e vakatokai me Lewe ni Ketekete.

E vakaraitaka na iLiuliu ni Veitarogivanua ni qele qo e soli ena vuku ni veidokadokai kei na veinanumi vakavanua. E dau soli vua na marama e vakawatitaki tale ena dua na mataqali se yavusa se ki na dua tale na vanua. E vakatokai na qele qo ena vosa vaka-peritania ena vale ni volavola ni Veitarogivanua me nodra na agnate descendants ni kawa e soli vua na qele ka kena ibalebale ni na taukena ga na marama e soli vua na qele kei na nodra kawa na luvena tagane.

E duidui na vanua, e duidui vata kei na ivakarau ni kena taukeni na qele qo. Eso na vanua e soli ga me ?iKanakana?, e kena ibalebale ni sega ni rawa ni na lisitaki se volitaki.