Veisureti tale o Isireli

E KABURAKA tiko na itikotiko ni vuli na Sanhedrin kei na Mikdash Educational Center ni na vakayacori tiko e dua na soqo e Jeruisalemi, ena nodra na sureti tiko na veidomo kamica ena buturara ni lagasere, mera mai marautaka vata na vakananumi ni yabaki e vakayacora kina na veibuli na Kalou ena noda vuravura.

Ena vakayacori tiko na soqo qo ena yakavi ni i ka 3 ni Seviteba ena Archeological Park – Davidson Center kei na matamata o Hulda ka donuya na Western Wall Plaza mai Jeruisalemi.

E vakayacori na soqo qo ni vo tiko e dua na siga ni se bera nai ka 25 ni vula nodra na Iperiu ena vula o ‘Elul’, nai ka 5778 ni yabaki ni kena vakananumi na buli ni noda vuravura me vaka era dau vakayacora na Jiu.

Na soqo qo ena veibulagoci tiko ena nodra vakaitavi na sureti ena kaburaki tiko ena mona livaliva ki na veivanua ena veiyasai vuravura taucoko. E tukuna tiko o Rabai Hillel Weiss na gusunivosa ni koronivuli o Sanhedrin, ni soqosoqo e yavutaki vakai Vola Tabu ena mataveilewai ka ra tiko kina e 71 na turaga ka veisureti raraba tiko vei ira na veiyasai vuravura, duidui itovo, kuli ni yago, dui vosavosa, duidui lotu me ra a vakaitavi ena soqo levu qo.

E tukuna o Rabai Weiss ki na Breaking Israel News ni i naki ni soqo qo me da na vakacerecerea na Kalou koi keda na ka buli, wili kina na kalokalo, agilosi, serefimi.

E tomana o Rabai Weiss ni naki talega ni soqo qo me da na vakatutusa kina kivua na Dauveibuli ka kerea me na vakayacora na veiparofisai ni gauna e tukuni tiko ena i Vola Tabu.

E kaya ni kena vakayacori na soqo qo ena noda na vakarokoroko na ka buli vua na Kalou na Dauveibuli ka semati kina nai tukutuku nei Aisea na Parofita ni nona vale e nodra valenimasu na tamata kecega.

“Ka’u na kauti ira mai ki na noqu ulunivanua tabu, ka vakamarautaki ira ena noqu vale ni masu; a nodra i sro kama kei na nodra i madrali ena vakadonui ena noqu cabocabo ni soro, ni na vakatokai na noqu vale me nodra vale ni masu na tamata kecega.: Aisea 56:7

E vakamacalataka o Rabai Weiss ni soqo qo e i vakatakilakila ni veivutuni, ka lesu ki na savasava kei na lotu.

Na vakatagi ena vakayagataki kina na masu ka sema tiko ki na vitu na siga ni veibuli ni Kalou kei na i sema ki na valenisoro ka sema talega ki na yabaki vou kei na Yom Kippur na nodra soqo na Jiu.

Ena vakarautaki e rauta ni 4000 na dabedabe vei ira na lewenivanua. Ena vakarautaka ko Dr Mordechai Sobol na i vakatagi ni soqo qo.

Latest posts

More Stories