Veisiko o Bainimarama

E a laki tiko voli mai Ositerelia na noda Paraiminisita, o Voreqe Bainimarama ka laki vosa tiko vei ira na noda era tiko mai keya.

E vakaraitaka o Bainimarama ni so vei ira na daunipolitiki era via kauti keda tikoga e muri ena veivakaduiduitaki, kei na veiliutaki ca ena noda vanua.

E a vosa tiko o Bainimarama ena dua na soqo nodra na daunibisinisi mai na Victorian Multicultural Sports Association ka vakayacori mai Malevani ena Siga Tabu.

Vakaraitaka ni sa roro voleka tiko na veidigidigi ka sa vakatau tiko vei ira na lewenivanua e Viti na nodra raica lesu na veika e sa yaco oti ena 10 na yabaki sa oti.

E kaya ni dodonu vei ira na lewenivanua e Viti me ra na tu ka maroroya na nodra vanua, na nodra tamata kei na noda sa mai kacivi vata ga ena dua na yaca kei na veika kece tale esa rawati mai ena loma ni 10 na yabaki sa oti.

E kaya ni sa tu vakarau me na vakavinakataka na noda bula na lewei Viti ena veivanua duidui eda tiko kina.

Tukuna ni na tomana tikoga na cakacaka vinaka e sa qarava tiko mai, ka sa tu vakarau me na tosoya cake na nona i vakarau ni veiqaravi e Viti kei ira na lewenivanua.