Veisau ena kabani

ESA soli ki na valenivolavola ni yasana na gauna me yacova na vula o Jiune me na vakarautaka mai kina na i tuvatuva vakailavo ni Tailevu Holdings Company.
E laurai ni sega ni vakarautaki tu vakavinaka na veika vakailavo ena vuku ni kabani oqo me vaka e kaya ena tabana ni tukutuku na jemeni ni matabose ni yasana o Turaganiovisa Rusiate Tudravu.
E tauri na i tukutuku ni mai tekivu na veiqaravi ni bisinisi oqo ena 1996.
E ra a kauta cake eso na vakatataro eso vei ira na mata ni tikina ka ra voli sea tu ena kabani oqo ena vuku ni nodra se waraka tikoga na nodra ilavo era dau ciqoma ena vuku ni nodra voli sea. Vakadeitaki ni sa kerei ena bose ni yasana me ratou biuta mai na vakailesilesi ni kabani na nodratou i tuvatuva vakailavo mai na 1996 ki na 2005, ia e sega tikoga ni vakayacori na tikina oqo.
Esa mai digitaki talega e dua na matatimi vou me na raica na kena vueti cake na kabani ni yasana oqo.
E namaki me ratou na cicivaka na kabani oqo na matatimi vou ni sa oti na bose vakayabaki ni kabani ena vula o Jiune.
Ena bose ka vakayacori ena Lotulevu sa oti, e mai dolava kina na Bose ni Yasana na i liuliu ni matanitu, Voreqe Bainimarama. Vakaraitaka kina o Bainimarama vei ira na lewenibose me ra kua ni kauwaitaka eso na i tukutuku ni veivakacacani ka me ra tudei.
E levu sara na ulutaga vinaka kei na taro e tarogi cake vei ira na vakailesilesi ni matanitu era tiko mai na koro o Nauluvatu ena loma ni rua na siga ka vakayacori kina na bose.
E sa kau cake talega e dua na vakatutu oya me na vakayacori e dua na nodra bose vata na turaga mai na loma ni yasana, ka rauta ni 20 na kedra i wiliwili.
Tukuna na Roko Tui Tailevu o Iliesa Delana ni sa veivosakitaki tiko na vakatutu oqo kei na i liuliu ni matanitu ena kena vakayacori ka vakailavotaki na bose vakaoqo.
E kaya o Ratu Epenisa Cakobau ni bose oqo e sega ni veitalanoataki kina e dua na ka vakapolitiki ka me kua talega ni lewena mai na veitalanoa oqo e dua na daunipolitiki.