Veisa ena i sulu ni lotu

ERA sega vakadua ni tadra na i soqosoqo vakamarama ni koro ko Nasau e na Tikina ko Navakasiga e na yasana ko Bua, ni sa basika yani e na nodra koro na nodra i sulu ni matasere e na Vakaraubuka na i ka 20 ni siga e na vula sa dromu.
E vakadeitaka mai ko Seraia Naivuga ni veivosakitaki ni nodra i sulu e mai vakayacora na tacina o Akanisi Lewasavu ki vei Melika Rokodi na i liuliu ni kabani na “You Production”, oya me volia na nodra i sulu, cula, ka qai vakauta sara ki na nodra koro.
Tomana o Naivuga ni veidinadinati era vakayacora, sa i koya me dua na marama me nona i tavi e dua na ibe, ke sega me solia ga na i lavo mei sau ni vinivo.
Era lewe 53 kece na lewe ni soqosoqo vakamarama e na koro o ya, ka ra sa waraki iratou tiko mai na kauta yani na nodra isulu ni matasere na i Soqosoqo Vakamarama.
E kaya o Rokodi ni veidinadinati e ratou cakava vata kei Lewasavu e vakayacori e na yabaki sa oti, ka ratou vakarautaki kina e lewe 4 na marama e na i vakarau ni vinivo na (small, medium kei na extra large).
Na i vakarau sara ga oya e qai culacula kina o Rokodi, ka sega ni bau cala vakalailai e dua na ka.
E vakaga e vakarautaki vei ira na marama na nodra sa dara na vinivo e na kena rauti ira vakavinaka, ka ra drukataka sara ga na maqosa kei na totoka ni culacula e cakava o Rokodi.
Ia, e na siga Vakaraubuka ni ratou yaco yani na vulagi e ra sa wawa tiko mai na marama e na koro ko Nasau.
Ni vakayacori oti ga na veisevusevuti vakavanua, sa tubera sara o Moape Matau e dua na kamunaga mei soli ni nodra i sulu na marama.
Dede vakalailai ratou sa qai cakava mai na turaga ni koro ko Nasau e dua tale na kamunaga mei vakavinavinaka ni i sulu, ka vakakina na i vakaraitaki ni magiti era sa vakarautaka toka mai na marama.
E sega ni tukuna rawa e dua na ka, ka ra kureitaki liga ga e na qoroqoro o ira na lewe ni koro ko Nasau, e na gauna era sa dara kina na nodra i sulu ni lagasere na i Soqosoqo ni Marama ni koro ko Nasau, ka ra la’ki taba sara e na nodra valenilotu e na bogi oya.
E kaya o Rokodi ni sa nanumi ira dina na marama ni Nasau e na dredre ni nodra dau biuta mai na nodra koro me ra gole ki Labasa se ki Suva, ni sa la’ki butuka mai na nodra koro e na dredre ni veilakoyaki kei na i lavo era dau vakayagataka e na nodra biuta na nodra i tikotiko.
E sega ni vakamelei rawa na magiti kei na i yau era vakarautaka mai na marama ni nasau, e na nodra marautaka ni sa tadu yani e na nodra matavura na i lakolako mai Suva e na siga o ya.
“Ki vei kemuni ga na marama ka dredre na gaunisala ni nomuni vaqara i lavo me vakataki iratou mai Nasau, ka ko ni vinakata me vakayacori na veisolisoliki se veireguci na loloma, e na kena cula na nomuni i sulu ni matasere, ni qai veitaratara ga e na naba ni talevoni na: 9652192 ka veitalanoa kei na i liuliu ni “You Production”,” kaya o Rokodi.