Veimaroroi e na i oloolo ni veisusugi

Update: 10:53AM E DUA na vakacegu levu era a mai solia na marama ni yanuyanu vakaturaga o Beqa vei ira na marama ni koro o Rukurukulevu mai Nadroga ena siga Vakaruwai sa oti.

Oqori ena kena mai soli wale na nodra i vakamoko ka gole sara tiko mai na i solisoli oqo mai vei Naomi Ragogo Roberts, e dua na marama ni Rukua, Beqa ka sa vakaitikoiko tudei tiko mai Serene ena gauna nikua.

E tukuna o Akosita Catanasiga na nodra i liuliu na marama ni Beqa ka ra soli vakamoko tiko mai oqo ni sa oti oqo e va na yabaki na nona veivuke tiko mai o Naomi kei na nona matavuvale vei ira na marama ni Beqa ka sa tara tale ga na noda Viti ena gauna nikua.

O Naomi e dua na marama ka sa bau veivuke sara ga mai vei keimami na marama ni Beqa, vakabibi ena dua na neimami tiki ni sulu e loma oqo na marama na i vakamoko.

Sa tete sara na nona veivuke oqo ka keimami sa voleka ni tara kece na veiyasai Viti.

Keimami sa lesu mai Wainibuka, Naitasiri, Vanua Levu, mai na yasana o Ra kei na vica na koro e Nadroga ena kena soli wale tiko na i vakamoko vei ira na marama ka keimami dau raica votu sara ga e matadra na marau levu baleta nira sega ni solia kina e dua na i lavo.

E dua na marama e a luluvu ni tukuna ni dua tu ga nona i vakamoko ka se kauta sara mai e na vale nei tamana e na gauna e a se vakamau kina, e dau dara ga ena gauna ni soqo, tukuna o Akosita.

E dua na marama e soli wale vua e va se lima nona i vakamoko.

Oqo na i vakamoko sau lelevu mai Serene e vakauta tiko mai o Naomi ka tiko na kedra i sau ena sagavulu na dola ka so e sivia na dua na drau na dola.

Keimami solia tale ga nodra i vakamoko o ira na marama tauvi kenisa.

E soli tale ga nodra i vakamoko o ira na gone lalai kei ira na marama bukete ka vakarautaki mai me ganiti ira ga.

Kuria o Akosita ka kaya ni tukuna ni dau vakatau tiko ga mai vei Naomi na vanua se koro mera laki soli vakamoko kina.

E rau tukuna o Salome Nagata kei Merewai Biu na nodrau vakavinavinaka levu vei ira na wekadratou mai Beqa.

Keimami vakavinavinaka na marama ni Rukurukulevu ena veivuke levu era mai cakava na neimami KAI mai Beqa.

Oqo e dua na neimami tiki ni sulu na marama ka tiko sara e cake na kena i sau, ia, ni mai soli wale tu vaka oqo sa dua na ka na neimami vakavinavinaka cecekia, tukuna o Salome.

E kuria o Merewai ka kaya ni ra tabili tale ga mai na marama ni tikina o Cuvu kei ira na marama ka ra a makete tiko e Naidovi kei ira eso na marama ni Idia.

E vaka e kama na veigasau ni sa tete na i tukutuku nodra tiko na marama ni Beqa e valenisoqo, o ira na suka mai na cakacaka e na veiotela era vakusakusa mai mera mai votai tale ga, sa dua na ka vinaka dina, tukuna o Merewai.