Veika mo na namaka

Update: 11:17AM EDA a wilika tiko mai na macawa sa oti na veika meda nanamaki ni sa buki e dua na veiwekani vou ena nodrau mai vau ka tauyavutaka e dua na vuvale vou e dua na turaga kei na dua na marama. Ni wiliwili sara yani.

Lima: Na sotavi ni gagadre vakayago. Oqo e tara na gauna ni veiyacovi se tikovata ni veiwatini.

E levu na cauravou kei na goneyalewa era a maroroi ira mai vakabalavu me rawa ni ra qai lai veiyacovi kei watidra ni oti na nodra vakamau. Me vaka ni dua tu na ulutaga ni veitalanoa na veiyacovi e na bula ni cauravou kei na goneyalewa, sa mani buli cake na nanamaki ki na gauna talei oya.

Ia ni lai oti na imatai ni veiyacovi ka sa sega ni qai vakilai ni se vo e dua tale na ka talei, sa vaka e lai luluqa mai na draki talei ka a namaki vakadede yani. E so sa sega ni vaka e lai lomadra me ra veiyacovi ka so e vaka e ka ni voraki vei ira.

E na uasivi me veitalanoataki vakavinaka ka vakasavasava na tikina oqo ka ni dua na ka bibi e na noda bula vakaveiwatini na veiyacovi. Oqo e dua na ka me marautaki vei kemudrau ruarua ka me kakua ni vakatara tiko ga e dua ka sega ni via meke o koya na kena ikarua.

Na veiyacovi e ka Vakalou ka savasava vakaoti ni vakayacori e na loma ni vakamau. E dau kena icavucavuti ni veiwatini e bulabula ka daumaka nodrau bula ni veitaleitaki vakayago e na marautaki ni veiyacovi, e na daumaka tale ga nodrau veimaliwai vakaveiwatini.

E levu na veiwatini e druka nodra bula ni veiyacovi, era tini e na kavoro ka ni ra vaqara e so tale na vanua era nanuma ni ra vakacegui vakavinaka kina. Na gauna ga o sogosogo kina vua na watimu e na buturara ka a dodonu me vakacegui kina, sa na vakasaurarataki me vakararai ki na tikina tani. 

Ia kevaka e dua o iko o dau vakasaurarataka na watimu mo drau veiyacovi, sa na uasivi mo veisautaka ka rokovi watimu. Kilai koya vakavinaka baleta drau sega ni tautauvata. De gadreva ko koya me vakacegu mada vakalailai, ia e na sega ni dede e na vinakata nomu veitokani e na ka vata ga o gadreva tiko. Oya na veivakarautaki ni Kalou vei kemudrau ruarua me vaka na ituvatuva ciqomi e vonoti koto e nomudrau dui bula.

Ono: Nomudrau veiba ka tini vagauna e na veivala. 

Ni da se qai veivosaki voli, eda vatavatairalagotaka noda bula vakawati me daumaka ka gauna ni marau ka sega ni bau cila mai kina vakalailai noda nanamaki ni da na dau veiba ka veiletitaka vakaveiwatini e vuqa na ka.

E na gauna sa yaco kina na imatai ni vica na veiba, tau na vosa bibi ka lako sara e so na iroba, e vaka e da kidacala ka ni oya e dua na draki a da sega sara ga ni namaka mai ni na mai yaco. Ni sega ni vakatulewataki vakavinaka na veileqa vakaoya, sa buroro sara mai lomada ni na sega ni dede na noda bula vakawati ni sa tekivu tu vaka oya e na veiba.

Ia e na yaga me matata ni veiwatini kece e vuravura e tiko na gauna eda duidui kina vakaveiwatini ka tubu na veiba se na tau ni so na vosa kaukauwa. Au kila tiko e so na veiwatini era a vakaciriloloma mai nodra itekitekivu ka da nanuma ga ni sega ni dua na ka e ra veiba kina, ia e muri, sa lai yaco me kavoro nodra vakawati.

Me da dau ciqoma ni tiko na gauna e tubu kina na ua codro e na noda vakawati, e na uasivi me da vakaceguya sara mada kina na yaloda e na veika eda via talaucaka. Ia ni sa ruru, me da qai veivosovosoti ka da tovolea me da vakacakuleya se cava na vu ni codro ka da vakadeuca tale ga se sala cava e rawa ni levei kina.

E vinaka na veiba ni ivakaraitaki ni bula, ia me kakua ni vakalaivi me sa mani lai veivakacacani sara ka vorolaki kina nomudrau waqa. Ni sa lai dede vakalailai na toso, sa drau na qai matau ga mai e na kena sokotaki na nomudrau waqa me veiraurau vinaka kei na taba ni cagi cava ga e liwa mai. Oya e taura na gauna ka sa ikoya e vakaibalebale kina na vakawati me ka ni bula taucoko. 

Vitu: Daru sega ni taucoko sara vakaoti.

E na gauna eda se qai veivosaki voli kina, eda nanuma ni da sa taucoko sara tu ga ka sai koya oya na ka e vinakati keda kina na watida. Eda sega ni rawa ni vakamelea tale ga e dua na ka e na bula ni watida ka da nanuma ni ra sa taucoko tu vakaoti.

Ia e na loma ni vakawati, eda sa qai lai liaca ni koto e dua na tama ni veicalati levu e na ka e da a nanuma mai kei na ka dina eda sa qai mai sotava. E sega ni taucoko vakaoti na watida me vaka na ka eda a nanuma taumada, ka vakalewai keda tale ga ko watida e na levu ni noda malumalumu. Kena ibalebale ni da sega tale ga ni taucoko.

Eso na ka eda a namaka me ra na dau cakava na watida e na nodra vakasaqa kei na nodra qaravi keda e sega ni vaka na lomada, ia na veika era namaka mai vei keda e sega tale ga ni da qarava rawa. Sa qai mai tu yani na duidui lelevu, ni veicalati na veika eda namaka mai kei na veika e mai sotavi.

Sa qai tu tale na duidui ni noda ivakarau ni bula e na veika e da vakasamataka se vinakata. Eda lomaleqa se na toso vakacava na bula vakawati ke sa vaka tu oya na titobu kei na rabailevu ni noda duidui.

Oya sara tale ga na inaki ni vakawati. 

Me daru kauta vata mai na nodaru duidui ka daru tovolea me daru vakaduavatataka e na loma ni nodaru vakawati me tekivu oqo ka lako yani. Oya na ka vuni Vakalou me baleta na vakawati ka mai vakaseyavutaki noda duidui ni da sa vakatitobutaka noda veilomani, veirokovi ka veitaleitaki vakaveiwatini e na gauna taucoko e da na bula voli kina.

Au sa laiva toka na vitu nai ulutaga oqo me vukei kemuni na sa qai vakawati vou, ia me sa nomuni ivukevuke tale ga na vakawati dede mai e na nodra vakasalataki ko ira era qai vodo bera mai.