Veibasai na tali ibe vakayava

E VOLA yaca e na veibasai ni yasa ni ibe ko Rota Saukadavivakaruakidakunivanua (e dau kilai ena yaca Ane)ka qai tekivu ena i otioti ni matanivola.

E laurai na kila vuni e tiko e na loma ni nona kila na talitali o Ane se talia na ibe vakayava ka dau kilai tani kina na vanua vakaturaga ko Totoya e na koro ko Tovu.

O Ane e talia na ibe qo e talia e na yasana veibasai oya me talia na daku ni ibe ia na i rairai dina ni ibe e tiko e yasana ka dua. Ni talia madaga na mata ni vola e na ibe qo e na tekivu e na i otioti ni matanivola ke via vola yaca.

E dua na vakaraitaki ni noqu talia yaba qo e na noqu vola na yaca qo na Tovu, au vola e liu na U oti au qai vola tarava mai na V, oti sa qai dewa yani e na O sa qai T, e kaya o Ane.

E vaka tiko oya na nona talia na ibe qo o Ane (Ane) ena gauna e veituberi tiko kina vei ira na marama ni Tovu era tiko e Suva e na vuku ni kena gadrevi me vakabulabulataki tale na nodra i yau dina na marama ni Tovu mai Totoya.

E vakaraitaka na marama yabaki 77 qo ni ratou sa vo ga e lewe vica saraga esa kila tiko na mataqali tali ibe vakayava ka sa kena gauna qo me sa na vakavulica vei ira na wekana mai Tovu me ra kila ni bera ni qai mai takali.

Au marau ena veikacivi ni Kalou ni sa na rawa meu vakaraitaka vei ira na marama ni Tovu na ka au kila ni bera na noqu mate, e kaya o Ane.

E vakaraitaka ko Roko Josefa Cinavilakeba na Turaga Roko Sau ni nona ituvatuva tiko e na gauna e a tekivu taura mai kina na i tutu vaka Roko Sau ena vanua o Totoya oya me na vakadeitaka tale na nona vanua na kena itovo, nai yau ni vanua o Totoya kei na sema ni veiwekani vakavanua e Viti.

E dua na ka gona au vakabibitaka qo na i yau ni vanua o Totoya oya na mataqali talitali ni ibe vaka oqo ka sa tekivu yali tiko yani vakamalua eda sega ni rawa ni beitaka e dua ena vuku ga ni noda sa mai wele tiko e na dua na gauna qo kina veika vovou e tara mai na noda vanua, na cakacaka ni liga e kilai kina e dua na vanua sai koya na yaubula ni vanua ya.

E tiko vakaya keina kena itovo keina veiwekani ka vola bula kina veitaba tamata era bula muri mai.

E sega wale ga ni colati kina na bula vakavanua yavutaki kina na loloma keina yalo dina ni qaravi tavi eda dau divi ni bula vakaitaukei.

Na veivakabulabulataki oqo veiira na neitou marama sa gaunisala torocake ni nodra bula vakailavo me sotava na bula ni vuvale ni veisiga ena vanua ni cakacaka e kaya o Cinavilakeba.

E na nona vakamacalataka tiko na Turaga Roko Sau na ibe e veivakatavulici tiko kina o Ane oya ena kena tali na ibe ia na ka dina me baleta nai rairai ni ibe e tiko e na yasana ka tabogo tiko.

E kaya na Turaga Roko Sau ni sa qai dua dina na ka e veivakakurabuitaki ka ni sa qai raica vakadua na mataqali tali ibe vaka oqo ka gadreva tiko o koya me na vakabulabulataka tale e na nona vanua nai yau dina mai kea.

Qo madaga sa dua na ka vinaka ni bula tiko na soqosoqo vakamarama mai Totoya ka toso tale tikoga na soqosoqo vakamarama e Suva ka rau veisemati vinaka tiko me yacova mai na gauna qo, e kaya na Turaga na Roko Sau.

E kaya o Ane ni levu sara na veimataqali talitali e ra dau cakava oya se na veimataqali droini e ra dau cakava e na kena tali na ibe qo na ibe vakayava.

Vei ira na marama era sa mai vuli tiko qo e vakaraitaka o Ane ni sa kila vinaka sara tiko ko Litiana Volau na mataqali tali ibe vakaoqo ka sa na nona i kaukau lesu ki vanua me na laki vakavulici ira na soqosoqo vakamarama era tiko mai Tovu, Totoya ena gauna gauna ni nodra soqoni.

Latest posts

More Stories