Vakayagataki ni gauna e Bua

NA kena vakayagataki vakavinaka na gauna, e sa dua dina na ka uasivi kevaka eda vakacuruma me tiki ni noda bula e na veisiga.

Na veika oqori e sotava na Na i Lalakai mai na koro ko Naviqiri, Navakasiga e na yasana ko Bua, ni raici ira na marama ni ra vakaogai ira tiko e na nodra voivoi, e na gauna era gunu yaqona tiko kina na nodra turaga.

E kaya ko Salaseini Nadoleica ni yaca ni caka voivoi e ratou cakava tiko e na bogi oya na “vakatoga”.

O ya na kena vakasaqari na voivoi, sigani sara vakavinaka me mamaca, gauna sa mamaca kina era qai mai viviga me vaka e ratou cakava tiko e na bogi o ya, ni bera ni ra qai vesu vata me ra samulaki.

“Na kena samulaki oti ga, sa qai mai tali sara yani na loga.

“Ni samulaki vakavinaka na voivoi, ena vulavula sara vakavinaka, ka ko ni na raica na ibe ni Navakasiga, e na duatani mai vei ira na vo ni ibe e na yasana ko Bua,” kaya ko Nadoleica.

Tomana ni so na bogi era dau yacova sara na 9 se 10 na kaloko na nodra cakava toka na vakatoga, ni bera ni ra qai veitalatala.

E kaya tale o Nadoleica ni vuqa na gauna era dau volitaka na nodra ibe e na gauna ga ni veisa, se me so era otataka yani.

Kuria ni sa i vurevure sara tu ga ni lavo e na nodratou koro na tali ibe, ka sa toso tiko kina na bula ni vuvale, na veika e lavaki mai na Lotu kei na vanua. E dau vakauqeti ira na gone yalewa ni koro ko Naviqiri ko Nadoleica me ra vulica vakavinaka na veitarataravi ni veika e vakamuri, me yacova sara ni sa la’ki tali e dua na ibe.

More Stories