Vakavakarau ki na Commonwealth

NODA Railesu e na macawa oqo, e da na wilika kina na nodra vakavakarau na noda dau qito ki na Commonwealth Games.

Ni tei wilika sara mada na i tuktuku ka a tabaki e na Na i Lalakai e na yabaki 1986:

E ratou sa tu vakarau na i soqosoqo ni dauveivacu e na noda vanua, e na nodra digitaki na cauravou me ra na matataka yani na noda vanua e na sotasota ni Commonwealth Games, ka na la?ki vakayacori ki Edinburgh, Sikoteladi e na vula mai oqo.

E ratou sa digitaki mai na i soqosoqo ni FABA, o Abraham Thomas, Net Ledua kei Setoki Mafi, me ratou digitaki ira na noda cauravou ka rawa ni ra vorata na qito oqo e na gauna e la?ki vakayacori kina ki Sikoteladi.

E kaya o Peni Wainiqolo na i vakalesilesi e cake ni FABA ni ratou a vakayagataka e $500 me vakavinakataki kina na rigi ni veivacu e na PWD mai Walu Bay, Suva ka dau vakayagataki sara vakalevu mai vei ira na dau veivacu e na noda vanua.

E na gauna oqo e ratou sa taura talega e dua na i vola kerekere na FABA mai vei iratou na kalavo ni veivacu na Tabua Boxing Club, ka ratou vakaitikotiko mai Samabula, ke rawa ni ratou la?ki tereni talega e na rigi ka tiko e na PWD mai Walu Bay.

Era sa tu vakarau talega na veilewe ni timi tale eso ki na sotasota ni Commonwealth Games ka na vakayacori tiko mai Sikoteladi e na vula ko Jiulai, ka okati kina na vaqiqi polo (bowling), na veitaucici (atheletics), na viritaki disi (discuss), na lave ka bi kei na vuqa tale.

Tukuna o Wainiqolo ni na dua na timi vinaka ena vakarautaka na noda vanua e na yabaki oqo, ka ra sa tu vakarau na lewe ni qito yadudua me ra na rawa metali mai me rawa ni vakarogoa tikoga kina na noda vanua lomani oqo ko Viti e na veigauna e sa tu oqo e matada.

Tomana o Wainiqolo ni ratou sa sasaga sara tiko vakaukauwa na cauravou era matataka na noda vanua me ra voroka na i sausau e se tuvalaka mai o Sani Fine e dua na cauravou ni Toga Matanisiga, ka a matataka na noda vanua e na yabaki 1982, ka rawata mai kina na metali koula e na nona vaqiqica na kena i sa e na dua na matau warumisa.

Kuria ni veivuke sara vakalevu na sotasota e ra dau cakava tiko na cauravou e na veimacawa, ka sa nuitaka tiko ni na digitaki e dua na timi vinaka me rawa ni valataka na noda vanua, e na qito oqo na veivacu.

Sa nuitaka tiko o Wainiqolo ni da na veitokoni na lewe ni vanua e na veimasulaki vei ira na lewe ni timi ni Viti, o ira na kena i vakalesilesi kei ira na nodra matavuvale e na i golegole e na vula ko Jiulai, me rawa ni laki rawati mai na qaqa, me kilai kina na noda matanitu somidi oqo ki na qito namaki ka ra vakaitavi kina na veimatanitu lelevu mai na veiyasai vuravura.