Vakasavui tukutuku

ESA na tekivu vaqaqacotaka na kena vakasavui na i tukutuku raraba ni lotu kei veika e veitalanoataki e valenivolavola liu na tabana ni tukutuku ni Lotu Wesele e Viti. E vakadeitaki mai ena dua na i tukutuku tabaki, ni sa na vakadavori e dua na i tuvatuva vou mai vua na vunivola levu ni tabana oqo, o Talatala James Bhagwan.

Mai laurai e dua na malumalumu ena kena kacivaki raraba e dua na i vola e volai mai ena tabana ni bula raraba ka vakadewataki vei ira na talatala ni veitabacakacaka ni bera na veidigidigi ena Seviteba 17.

E volai toka kina na veika e raica na tabana ni Bula Raraba ka veivakasalataki ki na lewenilotu ena nodra digidigi vakayalomatua, ni bera na veidigidigi ena vula sa oti. Ena laurai talega ni na vakadewataki vakavalagi na i tukutuku kece ni bera ni qai biu ena mona livaliva me ra kila talega na noda era sega ni kila na vosa vaka- Viti kei ira na lewenilotu era tu mai vavalagi.

E a vakadiloya na Paraiminisita, Rear Admiral ( Ret) Voreqe Bainimarama na Lotu Wesele ena kena volai na i vola oqo, ka tukuna ni na tosoi Viti e muri na mataiqali i vakarau ni vakasama e volai koto ena i vola veikauyaki oqo.