Vakasaqarai na yavusa Nasaunokonoko

AU sa na kauti keda lesu tale ki na bati ni drano levu mai Taqaniika na vanua e rau mai vakoro kina na veitacini e rua qo ni bera na nodra qai gole mai me rau mai tawani Viti me vaka e maroroi koto e na neitou i vola vivigi ka sa kena gauna qo me sa sereki malua yani.

AU sa na kauti keda lesu tale ki na bati ni drano levu mai Taqaniika na vanua e rau mai vakoro kina na veitacini e rua qo ni bera na nodra qai gole mai me rau mai tawani Viti me vaka e maroroi koto e na neitou i vola vivigi ka sa kena gauna qo me sa sereki malua yani.

Oya na veika e vakaraitaka ko Ratu Sekove Rokali na kawa ni vunivalu e Nasaunokonoko ena nona na talanoataka na i tukutuku ni veiwekani se vuvale vaka Nasaunokonoko kei na Naisanokonoko.

?E rau a tawani Kuduski voli kei Wainabi na veitacini qo ena bati ni drano levu mai Taqaniika e na gauna makawa ni oti na nodrau biuta mai na vanua o Isireli kei na kena takosovi na Joritani,? e kaya o Rokali.

E tomana o Rokali ni a mai tawani Kuduski o koya e qase vei rau ka ulumatua ia o koya e gone vei rau e a tawani Wainabi tiko.

E vakaraitaka o Rokali ni o koya ka qase vei rau e ratou lewe tinikarua ka dua ga vei ratou e yalewa o koya e i kavitu vei ratou na veitacini.

?Ni ratou sa lewe levu ka sa oso nai tikotiko mai Kuduski esa mani koto nai nakinaki me sa biu na vanua oya me sa vakasaqarai na vanua ka a yalataki mai vua e na Joritani me na mai vurevure ni veivakalougataki kina,? e kaya o Rokali.

E ratou a qai vodo mai e na waqa ka yacana na Naidrigiti sai koya oya nai matai ni waqa ka biubiu mai ka i matai talega ni waqa me kele mai Viti.

E kaya ko Rokali ni ratou lewe 12 na vuvale ka tiko oqo mai Kuduski e ratou mani biuta mai na vanua oya ka mai tawani sara na yanuyanu o Solomone, Papua Niu Kini, Niukaledonia, Vanuatu ia o koya e gone duadua e qai mai tawani Viti.

?O koya duadua mai na lewe 12 oqo ea kauta voli mai na 12 na vatu kei na i titoko ka soli mai vua e na Joritani esa mai maroroya vinaka tiko oqo e na noda vanua me yacova mai nikua,? e kaya o Rokali.

E tomana e na nona italanoa o Rokali ni o koya ka i ka vitu e yalewa e na vuvale e lewe 12 oqo ea qai vakawati mai Soweto e Aferika ka mani 17 kina na luvena ka luvena gone duadua e yalewa.

Ia, me vaka esa vakaraitaka oti ko Rokali ni a tawani Kuduski o Nasaunokonoko ka tawani Wainabi na Naisanokonoko me vaka e rau veitacini ka dua e qase kei koya e gone vei rau.

?E dua vei ratou na gone e lewe 17 qo ka luvei Soweto kai tini e yalewa e qai mai karua ni wati Lutunasobasoba ka basika mai ena kawa ni Naisanokonoko,? e kaya o Rokali.

E tomana e na nona i tukutuku o Rokali ni matata vinaka tiko ni lewe dua ga o Ro Kwadua mai na Nasaunokonoko e tagane ka mai tawani Viti taumada ni bera ni qai yaco mai na i lakolako nei Lutunasobasoba ka i karua ni watina ko Soweto ka kawa mai ena i ka vitu ni yalewa e na vuvale e 12 ni Nasaunokonoko.

?Nai tukutuku oqo keitou dau maroroya koto mai e na dua na gauna balavu ka wili vaka neitou i vola tabu ni vuvale ka sa rairai kena gauna qo me keitou sa serelaka yani vakamalua me rawa ni matata tiko na neitou i sema ni veiwekani vei ira talega na mata veiwekani e ra tiko oqo e Viti,? e kaya o Rokali.

E tomana o Rokali e na nona i tukutuku ni rau sema na vuvale e rua oqo ko Nasaunokonoko kei na Naisanokonoko e na kau na nokonoko mei vakadinadina ni nodrau vuvale ni a qase ga o Nasaunokonoko ka gone vei rau ko Naisanokonoko.

E tomana e na nona i tukutuku o Rokali ena gauna esa mai tiko voli kina e Viti ko Lutunasobasoba e dau qai vakararawataka voli koya nai karua ni watina ka luvei Soweto.

E kaya o koya esa mani biubiu kina na marama ka i karua ni wai Lutunasobasoba qo ka dro sara ki Naitavuni me laki tiko voli kina.

?Ena nona tiko voli mai Naitavuni ea mani bukete ka vakasucu talega kina ka qai vakasucuma e dua na gonemarama rairai totoka,? e kaya o Rokali.

E tomana o Rokali e na nona i tukutuku ni marama sara talega oqo esa i tekitekivu ni Radini Waimaro ka kilai na kena i vola i tukutuku ni o koya na Radini Waimaro ia e a mai tiko voli ga e Naitavuni me vaka e maroroi koto na kena i tukutuku vei ratou na vuvale Nasaunokonoko.

?Nai tukutuku oqo au vakabauta ni na tukutuku vou tiko vei kemuni na lewei Viti ia, na kena dina e matata vinaka tiko vei keitou me baleta nai talanoa kece oqo,? e kaya o Rokali.

E tomana ni tiko na kena i vakadinadina ni talanoa ka sega ni dua e buli wale tu ga ni maroroi tiko oqo vei keitou na kena i vola vanua ka vaka kina na kena i vola vivigi ka sala muria koto na neitou matanikatuba vei ratou na wekai keitou mai Naitavuni, ka vaka talega kina o ratou na neitou na Nakurukuruvakatini,? e kaya o Rokali.

Ena qai tomani tale yani.