Vakasakiti na qito nei Semi kei Tuisova

E RAU mai toqa tale e dua na i vola ena buturara ni rakavi tinikalima ena noda vuravura ko Semi Radradra kei Josua ‘Na Basi’ Tuisova me dua vei ira na veisa kaukauwa ka dredre me vorati ena iyatu emuri ena i vola ni veigauna ni rakavi vei ira na dauqito ni Viti.

Oya ni oti na nodrau vukea na timi ni Barbarians me vakadrukai Igiladi ena 63 kei 45 ena Siga Tabu.

A mai vakatokai talega o Radradra me cauravou dauqito vinaka duadua ni oti na nona tabaka e dua na sikoa ka vukea talega na kena la’ki tabaki e rua na sikoa, ka dua talega na sikoa e dodonu me tabaka o Tuisova ka mani qai solia vua e dua tale na nona i tokani me la’ki tabaka na polo.

E rau qito vinaka sara na lewe rua na cauravou ni Viti qo ena qaqa nei Barbarians ka vakavuna me rau wanonova toka yani na dauniveivakatavulici ni timi ni Fiji Airways Flying Fijians ko John McKee kei na dauniveivakatavulici ni timi ni Fiji Airways Fiji 7s ko Gareth Baber ena sotasota ni rakavi tinikalima ena Jiune qo kei na Qito ni Rakavi Lewe Ya Vitu ni Vuravura (Rugby World Cup Sevens) ena Jiulai qo.

E tukuna o McKee ni vinakati me na vakayacori e levu na cakacaka levu ka kaukauwa ka me rawa ni rau biu vata na dauqito e rua kei na levu na taledi e tiko ena gauna qo ena timi ni Flying Fijians.

E kacivaka o McKee e dua na timi kaukauwa ni Viti ena yabaki qo ka wili tiko kina na dauqito ni yabaki mai Iurope ko Leone Nakarawa, na dauqito vinaka ni Aviva ko Vereniki Goneva, Nemani Nadolo, Timoci Nagusa kei Jale Vatubua.

Ia, ena i yatu e muri o Ben Volavola, Vatubua, Radradra, Tuisova, Nadolo kei Timoci Nagusa.

E kuria o McKee ni levu na ka e dodonu me na vakayacori me yacova yani na Qito ni Vuravura ena 2019.

E ratou sa tekivu keba na timi ni Flying Fijians e Suva ena Tusiti.

Ia, e vakaraitaka o Baber ni dua dina na dauqito e tiko vinaka ena taledi o Radradra ka qito vinaka sara tiko ena timi ni Toulon e Varanise. e kaya ni na dua vei ira na dauqito ena tomika vakarawarawa me na curu ena timi ni rakavi lewe ya vitu. Na i vakarau ni nona dauqito tinikalima ena rawa ni moici tale me qito vitu.

Ia, e ratou sa vakaukauwa yago tiko ena gauna qo na timi ni Viti mai Lodoni ena nodratou vakarautaka tiko na sotasota ni London 7s ena HSBC World Rugby Sevens Series.