Vakacacani e tinikaciwa na koronivuli

VAKADEITAKA na Minisita ni Vuli ka Vunilawa o Aiyaz Sayed- Khaiyum ni rauta ni 19 na koronivuli era mai vakacacani ena cagilaba se qai vakanadakui keda ga ena macawa sa oti.

E vakaraitaka na veika oqo e Palimedi o Khaiyum ka tukuna talega ni vica na vale ni qasenivuli era mai vakacacani me vaka na vale ni qasenivuli e Nakini Primary School mai Nausori, mai Nalaba District School mai Ra.

E tukuna talega o Khaiyum ni sega ni rawa ni tukuna e dua na gauna me na rawa ni vakacavari kina na nodra vakacokotaki na veikoronivuli oqo.

A vakavinavinakataki ira talega na lewe ni mataivalu ena nodra veivuke ena kena samaki na veikoronivuli e Kadavu.

Vakaraitaka ni ratou se waraka tiko na i tukutuku ni vakacaca mai Kadavu ni bera ni na qai tuvalaki e dua na i tuvatuva ni veivakacokotaki.

Vakadeitaka o Khaiyum ni sa tiko na tabana ena Minisitiri ni Lavo, oya na Construction Implementation Unit eratou na raica tiko na i tuvatuva eso me baleta na kena vakavinakataki na koronivuli era mai vakacacani oqo ena cava o Josie kei Keni.

Ia na macawa oqo e sa i otioti tiko ni macawa ni vuli ni matai wasewase ni vuli ena loma ni yabaki oqo.