Tuva ivalu

E VAKARAITAKA o Gareth Baber na dauniveivakatavulici ni timi ni Fiji Airways Fiji 7s ni rawa ga ni vakadrukai na timi ni Sauca Aferika ke veivesu ena gauna donu ena veivesu me kaukauwa.

Ena nodratou vakavakarau tiko na noda cauravou ena sotasota ni Hong Kong kei na Commonwealth 7s, na timi ni Viti esa qaqa oti vakatolu ena sota kei Sauca Aferika, wili kina na Hamilton 7s ka qaqa kina o Viti ena fainala.

E tukuna o Baber ena sota mai Hamilton a vosa sara vakabibi vei iratou na cauravou lewe ni timi ni Viti me ratou kaukauwa na ivakarau ni nodratou veivesu ka kabakoro yani vakalevu kina vanua e vakayacori tiko kina na veivesu.

E tukuna o Baber ni qito rakavi lewe ya vitu e vaka toka na qito veivacu.

E kaya kevaka me tu donu na vakasama ena gauna ni tataqomaki, ka ni sega ni tiko vei ratou na polo, e rawa ni ratou na raica na sala me rawati kina na qaqa.

Na timi ni Viti esa na tovolea tiko ena mua ni macawa qo me na maroroya ena i ka va ni gauna veitaravi na bilo ni Hong Kong 7s. Ena waraki ratou talega na noda cauravou lewe ni timi ni Viti o Semi Kunatani mai Hong Kong me na rawa ni mai tomani iratou na noda matatimi ena sotasota ni Commonwealth 7s.

Ia, na timi ni Viti ena sota tiko kei Samoa ena i matai ni nona qito vakatobu ni oti na 12 ena 43 na miniti ena Vakarauwai, sota kei Rusia ni oti na 5 ena 54 na miniti ka na qai sota tiko kei Niu Siladi ni oti na 9 ena 54 na miniti ena bogi ni Vakarauwai.

Na kota fainala ena tekivutaki tiko ni oti na 12 ena 15 na miniti ena Siga Tabu, semi fainala ena tekivutaki tiko ni oti na 7 ena 41 na miniti kei na fainala levu ena vakayacori ena 11 na kaloko ena bogi ni Siga Tabu.