Tukutuku rekitaki vei ira na gonedau

Update: 12:08PM E LUTU vakavicasagavulu na nodra i cegu na dauqoli, kei ira na marama dau volitaki ika, ka ra laveliga e na reki e na kena sa dikevi, ka vakavoui na i sau ni nodra laiseni.

Oqo e na nodratou vola e dua na peni damudamu na Minisitiri ni Qoliqoli ki na laiseni ni qoli ka vou.

E kaya na Minisita ni Qoliqoli o Semi Koroilavesau ni i sau ni laiseni ka tiko e liu mai na $100 ki na $150 e sa lutu sobu sara ki na $5.50.

Tomana ni a bera tiko vakalailai na kena vakaraitaki na i sau ni laiseni vou, baleta ni levu na vakadidike matailalai e a vakayacori taumada kina.

�Taura mada o ira na dauqoli lalai, vaka vei au na $100 ki na $150 na dola e sa rui sivia sara ga vei ira me vakatauvatani kei na ika era rawata ena dua na gauna ni qoli.

�Au sa mani vakarota ki vei iratou na neitou i vakalesilesi me ratou vakalutuma mai  kina $5.50 me rawa ni bau dua toka na tubu vei ira na dauqoli,� kaya o Koroilavesau.

Kuria o Koroilavesau ni sa nanuma tiko na Tabana ni Qoliqoli me tosoya na laiseni oqo ki na va na yabaki.

Tomana ni ratou na qai bokoca ga na laiseni kevaka e sega ni saumi e na dua na yabaki, o koya gona e vinaka me ra sauma na nodra laiseni e na loma ni va na yabaki me rawa ni vakarawarawataka na nodra kere i lavo ni veivuke mai na kena tabana.

Tinia o Koroilavesau ni i sau ni laiseni vou oqo e na vakamuria tikoga na veika e dau vakayacori e na laiseni makawa, ka ni na vakatau tiko e na balavu ni waqa, na levu ni ika e rawati kei na veika tale eso.