Tubu na bisinisi nei Waqani

Update: 12:00PM �O keda meda vulica sara vakavinaka ka taura matua na veika maleka, ka tomana sara e na kena i vakatagedegede vinaka duadua, ni sa rawa tiko mai kina na i vurevure ni bula�.

Oqori na i vakamacala e cauraka mai ki na Na i Lalakai o Laitia Waqani na cauravou ni Deladamanu ka dau volitaki vainaviu tiko e na siti levu o Suva.

E kaya o Waqani ni sa dede sara na nodratou dau volitaki vainaviu toka e na yasai MHCC, ia, vuqa ga na gauna e ratou dau volivolitaki e na gauna e vakayacori kina e so na soqo lelevu, e na Koroturaga, se na rara ni qito mai Laucala.

Tomana na turaga yabaki 37 oqo ni o iratou na cauravou mai nodratouu koro e se makawa sara na nodra dau mai volitaki vainaviu tiko e Suva, ia, o koya e se qai oti koto ga oqo e rua na yabaki na nona volivolitaki, ia, e sega tale ni qai vakawelewele e na levu ni i lavo e sa rawata mai kina ena dua na siga.

�Kevaka e tawa vinaka na noqu noke e na dua na siga, e na rawa ni ciciva sara na duanadrau vakacaca na dola.

�So na gauna au rawa ni rawata sara e sivia na drau, ia, ke lailai e na tiko e na walusagavulu na dola e na dua na siga,� kaya o Waqani.

Tomana ni levu sara na lewenivanua era ciciva tiko na vainaviu e ratou dau sirotaka mai e na loma ni vanua, baleta ni ratou sega soti ni vakayagataka kina vakalevu na maniwa, me vaka era cakava tiko na kena vo e na gauna oqo.

E kaya o Waqani ni vanua e ratou teitei tiko kina e tadrava vinaka sara ga mai na matanisiga me yacova tale ni sa la�ki dre ko Malolo.

�Na vuna oya e kamikamica kina na vainaviu keitou volitaka tiko, ka kena i karua ni dau masulaki tiko vua na Daunilewa ena veisiga, me vakalougatataka tiko na qele e teivaki tiko kina.

�Oya sara ga na i usutu e dodonu meda dau vakararavitaka tiko vua na Kalou Levu na noda cakacaka e na dua na siga, e sa na qai sovaraka mai o koya na kena vo,� kaya o Waqani.

Kuria ni i lavo e rawata tiko e na volitaki vainaviu, e sa rawa sara tikoga kina na bula ni vuvale, na veika e lavaki mai na vanua kei na lotu, ka vakakina na nona i yaya ni vuli na luvena gone yalewa kalasi rua.

Sa veisureti raraba tiko yani o Waqani vei kemuni na lewenivanua, kevaka o ni se bera ni tovolea na vainaviu ni Deladamanu, ni gole ga yani e na yasa ni katuba ni MHCC e na Siti o Suva, e na yasana vaka ki vanua.