Tovo vakaitaukei

ENA vakayacori tiko e dua na drama vaka- Viti ka ratou biuta vata na i Taukei Trust Fund kei na valenivolavola ni matanitu o Varanise.

Ena tekivutaki tiko ena Lotulevu oqo, ka yaca ni drama oqo oya, Na i Lululu.

E na dua na i tukutuku tabaki, e sala muria tikoga na drama oqo na kena ka sa vakaraitaki oti ena yabaki 2010, ka levu sara era taleitaka.

Na drama oqo e sa laki yaco sara me tiki ni vuli ni lesoni vaka- Viti ka ra taura tiko na Fomu Vitu ena veikoronivuli torocake e Viti.

Na i talanoa ni drama vou oqo, Na i Lululu e baleta tiko na nodra kau na mata ni gone ki na nodra koro ni vasu, kei na kena soqo kece vakavanua ka dau vakayacori vata kaya.

Ena lima tiko na wasewase lelevu ni drama oqo, ka ra lewe 22 kece na turaga kei na marama era na vakaitavi ena drama oqo.

Rau vola ka biuta vata na drama oqo o Larry Thomas kei Doketa Apolonia Tamata, ka namaki me na levu tale era na baci nanamaki mai ena drama oqo.

E taleitaki ka tokoni vakalevu na drama oqo baleta ni vakayagataki ga kina na noda vosa na kawa i taukei, ka rawarawa na noda vakamuria na i talanoa, kena i karua eda na rawa ni vulica talega kina na i tovo kei na i valavala vakavanua e vakayacori ena soqo vakaoqo eda dau qarava na kawa i taukei ena noda veivuvale.

Kaya o Doketa Tamata ni kena kau mai na vakasama ni drama vakaoqo, e lako vata kei na tatadra ni tabana ni i Taukei Trust Fund ena kena tovolei me vakabulabulataki na i tovo, na vosa keda kilai tani kina.

Ena vakaraitaki tiko na drama oqo ena 11 na bogi, ka tekivu mai na bogi ni Lotulevu ena Playhouse e Selbourne Street e Suva.

Esa tekivu volitaki tiko na tikite ena valenivolavola ena veivuketi House e Draika, kei na vanua e na vakayacori kina na drama ena Plyhouse. E namaki me na qai cava na vakaraitaki ni drama ena i ka 18 ni Okotova.

Latest posts

More Stories