Totogi mate ena laba

SA totogitaki me cakacaka mate e na valeniveivesu e Lautoka e dua na tagane yabaki 53 e na vuku ni nona suaka mate na nona Nei e na nona vale e Nadi e na i tekivu ni yabaki oqo.

E a rogoci e na mataveilewai e Lautoka ni a sikovi nona Nei na tagane beitaki oqo o Talat Mahamood e na nona i tikotiko mai Nakavu e na i ka 27 ni Janueri ni yabaki oqo rauta toka na dua na kaloko e a yakavi me baleta na nodrau veiwatini tiko kei na luvena yalewa.

Kaya o Mahmood ni sa sega ni vakatulewataka rawa na i vakarau nei watina. E keri a mani tubu kina e dua na veiba ka mani suaka na ligai Mahmood o tinai yalewa se o nona Nei.

A mani kovea mai ligai nona Nei na i sele o Mahmood ka suasualaki koya me yacova ni sa cavuka na nona i cegu.

A mani vakasavasavataka vakavinaka na vanua e yaco kina na i veisua oqori, yarataka na yagoi nona Nei ki na ruku ni teveli ka vakadavora e delana e tolu na taya.

E a mani kunea na yagona na na luvena tagane ena nona suka yani na cakacaka ena veimama ni lima na kaloko ena yakavi.

Donumaka na gauna a se tiko kina e loma ni vale o Mahmood, ka qai gutuwa yani ki tautuba, toboka e dua na motoka saumi ka gole vaka ki Wailoaloa e na sasaga me drotaki ira na ovisa.

A mani vesu rawa e na i ka 29 ni Janueri.

E na i tukutuku ni veisele ka vakayacori ki vua na marama oqori e vakaraitaki koto kina ni a mate e na vuku ni levu ni drodro ni dra e a dewa mai vua. Sa na rawa ni qai vagalalataki o Mahmood ni oti e 15 na yabaki ni nona bala ki valeniveivesu.

More Stories