Toso vinaka na qito mai Iurope

E RATOU a qito vinaka na cauravou ni Viti ka ra vakaitavi tiko ena sotasota ni kota fainala ni sotasota ni rakavi tinikalima mai Iurope ena mua ni macawa sa oti.

A tabaka e dua na sikoa o Jale Vatubua na seda (centre) ni Fiji Airways Flying Fijians ena timi ni Pau ena nodratou vakadruka na timi ni Stade Francaise 35-32 ka me na tomani ratou na timi ni Newcastle Falcons ena sota ni semi fainala.

A vakacegui toka ena timi ni Newcastle Falcons o Vereniki Goneva ka vakaqitori o Josh Matavesi ena nodratou vakadruka na timi ni Brive ena 25 kei 10 ena Vakarauwai sa oti.

Ia, a mai druka na timi ni Edinburgh ka qito tiko kina o Viliame Mata ena 6 kei 20 vua na timi ni Cardiff Blues. A qito tiko o Mata ena i tutu ni naba 8.

A tabaka talega e dua na sikoa o Leone Nakarawa ena timi ni Racing 92 ena nodratou vakadrukai Clermont 28 kei 17.