Tolu na koula nei Cavuilati

EDA na sega ni rawa ni valu e na dua na i valu eda sa valutaka oti, ia, na ka ga eda rawa ni cakava me da vakataroga vei ira na tamada na i walewale era cakava ka ra vakairogorogo kina e na dela ni nodra gauna.
Oqori na i vakamacala e cauraka toka e na nodra Lotu ni Vanua na koro ko Natakala, na i Talatala ni Tabacakacaka o Rev. Kolinio Bulivakarua, e na Siga Tabu ni macawa sa oti.
E vakadeitaka o Talatala Bulivakarua ni nodratou tauri koula e lewe tolu na cauravou e na mataqali Vunivaivai e na koro ko Verata Wailevu e na bati ni uciwai na Rewa, e i vakaraitaki ni nodratou vakamuria ga mai na i qasiqasi ni nodratou i tubutubu turaga, me tekivu sara mai vei ira na tukadratou vakavica ka yacovi ira sara nai tabagone e na gauna oqo.
E vakadeitaka o Talatala Bulivakarua ki vei ira na lotu tiko e na lotu ni vanua ko Natakala e na siga oya, ni dodonu vei ira na i tabagone e na gauna oqo, me ra dau tarogi ira na nodra i tubutubu e na i walewale ni valu cava era a dau cakava e na gauna e liu, kecvaka e sega, era na kauta vata na nodra kila ki nai bulubulu.
E osodrigi na valenilotu mai Natakala e na lotu ena Siga Tabu ka vakabibitaka kina na nodra i Talatala ni Tabacakacaka na ulutaga ka nona i usutu tiko e na siga oya. Ia, o iratou na mataqali o Vunivaivai ka taka mai kina na kawa ni Cavuilati, ka ratou kilai e na buturara ni veitaucici kei na qito rakavi e na noda vanua, e ratou a vakarautaka talega e dua na kakana me ratou vakananumi kina na cauravou lewe tolu ka ratou rawata na metali koula e na nodra qito na gonevuli.
E a rawata na metali koula ni tebetaki veleti (discus) o Ratu Amena Cavuilati mai na Marist Brothers High School.
Na metali koula ni viritaki ka bi (shotput) e a taura o Ratu Mua Cavuilati mai na Ratu Kadavulevu School mai Lodoni, kei na veitaucici na 4 x 400 e a liutaka o Rokotora Bulivakarua ka cicivaka na i ka otioti ni wavoki o Ratu Penaia Cavuilati, ka ratou rawata talega kina na metali koula.
E sota vakavinaka na i vunau e na Siga Tabu kei na kanavata e ratou a vakayacora na mataqali o Vunivaivai vei iratou na cauravou. Sa dina ga na i mau, ka ni veika era a cakava mai na nodra qase, e curuma na nodra dra, ka ratou vakairogorogo kina na Cavuilati e na nodratou dui koronivuli e ratou vuli tiko kina.
E vakadinadinataka na i vosavosa oya o Ratu Amena Cavuilati, ka ni a sega ni bau vakaitavi vakadua e na veitaucici, se na viritaki ka bi e na gauna e vuli tiko kina mai na Vunimono High School, mai na fomu 1 ki na fomu 6.
Ia, na nona sa la’ki fomu 7 e na yabaki oqo e na Marist Brothers High School, e se qai matai ni gauna me tebetaki veleti kina, ka rawata sara na metali koula.
Tomana ni gauna ga e raici koya kina na nodratou Principal o Ben Salacakau, sa tukuna sara vua ni raica ga na tabana, ka rogoca na yacana, sa kila sara ga ni dua na taba ni tebetaki veleti vinaka e tiko vua.
E kaya o Ratu Amena ni o ya sara ga na vuna e vakaukauwataki koya me vakaitavi e na tebetaki veleti, kei na i walewale e solia vua o Salacakau, e kidroataka tale o koya ni rawata sara ga kina na metali koula.
E ratou vakavinavinaka sara vakalevu na cauravou e lewe tolu oqo ki na nodratou mataqali e na nodratou nanumi e na dua na kanavata me ratou vakavinavinakataki kina, ka sa tu na nodratou nuinui ni ra na raica tiko na tacidratou, ka na vakayaloqaqataki ira e na kena laveti tiko na qito, na vuli, ka vakabibi na veika vakayalo.