Tobu ni wai makawa ena yanuyanu o Kaba

NA neimami tobu ni sisili ka tiko oqo e na neitou loma ni koro, era se vakayagataka sara mai na tukai keimami vakavica, ka se vakayagataki tikoga e na gauna oqo.

E vakadeitaka mai o Watisoni Bole na turaganikoro ko Vatani, Kaba, Tailevu ni nodra tobu ni sisili oya, era dau mai vakadranu kina ni ra sa cabe mai waitui.

E totoka na kena i rairai ka ni roka drokadroka na wai, ka ra vakatoka na lewe ni koro me yacana na “green pond”.

Tomana o Bole ni ka e veivakurabuitaki kina na nodratou tobu, ni sega vakadua ni dua na mate ni kuli e veitauvi mai kina, ia, kevaka e dua e tauvi koya tiko yani na mate ni kuli, e na la’ki yali ni sa silima oti mai na nodratou tobu.

“E dua talega na ka e matalia kina na tobu ni sisili mai Vatani, ni tiko kina e dua na mataqali ika na vuvula.

“Na mataqali ika qo, e tiko ga mai e na uciwai na Sovi, e na ruku ni Medrausucu Range, ka kune tale tiko e na neitou green pond.

“Na gauna me keimami dau nimata kina na wai, ena sega sara ni laurai na ika.

“Ia, na gauna ga e tawa tale mai kina na wai, era na laurai tale na vuvula,” kaya o Bole.

Tomana o Bole ni gauna oqo, era sa vakayagataka tiko na wai ka keli mai na qara (borehole), ka dina ni se bera ni yacovi ira yani na wai ka gole yani e Viti Levu, ia, era sa vaka valelailai dre (flush toilet) tiko e na gauna oqo.

More Stories