Tiko na veisosomitaki

Update: 9:03AM E vakaraitaka na manidia ni timi ni Nadroga o Iliavi Kato ni na sega ni luluqa na vakavakarau ni nodratou cauravou ena sota vata kei Tailevu ena Vakarauwai oqo e nona sa mai gole ki Ositerelia o Epeli Natuikata me laki tomana kina na nona qito rakavi.

Na cauravou ni koro o Tau oqo ea biuta noda matasawa ena macawa sa oti me laki qilto ena dua na kalavo ni rakavi mai Serene.

Tukuna o Kato ni sa tu na kena i sosomi ka ra sa tu vakarau tu mera taqomaka na bilo cecere ni rakavi e noda vanua na HFC Bank Farebrother.

E dua na i naki levu ni kena cicivaki tiko na unioni ni rakavi oya mera sega wale ga ni qito tiko e noda vanua, i mera sagai me dua nodra konitaraki ni qito ki vavalagi ka mera laki rawata yani kina na nodra dui bula yadudua.

Au vakavinavinaka ni rawa ni sa gole oqo o Epeli, dina ga ni a dua toka na cauravou nuitaki ni timi ni Nadroga ena tabana ni lade polo ia sa tu na kena i sosomi, tukuna o Kato.

Kuria ka kaya ni na biuta tale tiko ga na noda vanua o Manoa Tamaya ena mua ni vula oqo me laki qito ena dua na kalavo mai Varanise.

Sa tiko na kedrau i sosomi ena tabana ni lade polo ena sota vata kei Tailevu ka keimami sega ni loma taqaya vakadua.

Era sa vakarautaki na cauravou mera na solia vei Tailevu e dua na qito vinaka.

O Tailevu e timi qaqa ka timi ni vanua, ena kena kaliraki mai vei iratou na Farebrother ena yabaki sa oti mai Suva, ea sega ni qito rawarawa vei Nadroga ka keimami sa nanamaki mena dua na qito vinaka ena Vakarauwai oqo, tukuna o Kato.

Esa veisureti tu vei kemuni kece na dauni veitokoni ena timi ruarua moni gole mai vakalewe levu ena rara e Lawaqa ena siga Vakarauwai oqo.