Tekivu vakavatukana na yalayala

ENA kena sa toso tiko na veika e mai yaco e na 2014, sa tekivu meu raica lesu tale na i lakolako makawa kau laki tao sara ena vula o Maji ni 2011 e na veika e a cauraka toka e dua na turaga ni Narokorokoyawa, Naitasiri ka kilai e na yaca buli o Double G e na dua na veitalanoa mai Savusavu ka a vakaitikotiko voli kina.

Na turaga oqo ka vakatokai tiko e na yaca buli oqo e a vakadewataka ki vua na i solisoli o Apolosi R. Nawai e na valenibula mai Waiyevo, Taveuni e na gauna e se cauravou lailai kina ka dau gade voli ki vua e dua na tamana lailai ka cakacaka voli mai kina.

Kaya o koya ni a dua na siga e a mani kerei tamana lailai o Apolosi ke rawa ni kauta voli yani ki valenibula na cauravou lailai ka tiko e na nona vale.

E sega vakadua ni kila o Double G, ni siga kadua e sa laki vakadewataki vua e dua nai solisoli ka vakavuna me cauraka kina e vica na yalayala ka sa vakavatukanataki oti mai e na 2011 me yacova mai na 2014 kei na kena e se bera ni yaco. Vica na vosa yalayala e a cauraka e na dua na veitalanoa ka dodonu me na raici lesu me lewe ni noke e na cavuikalawa vou eda sa vakanamata yani kina oqo.

Dua e kaya kina o koya na duidui ni sau ni bula ena gauna e liu e na kena se sau vinaka me vaka na suka, falawa, sucu, bisikete kei na vuqa tale.

Gauna oqo e sa tosocake na i sau ni veika kecega.

Me baleti keda na i Taukei, e kaya o koya, kevaka eda na yalomatua ena vakayagataki qele eda na lamata cake.

Sa na dua na ka na levu ni noda i lavo,

E na sega tale ni dua na ka e na rawa ni raici cake kina e dua na tamata vakavo ga ke vakayacori na teitei, e kaya o koya e na nona vosa ka tabaki e na i ka 12 ni Me ni 2011.

E tomana ka qase ni vasu ki na koro o Loa oqo e Buca ni teitei ga e na vakavuna me na tamata liga kaukauwa kina e dua na lewenivanua.

Me baleta na i yaubula e na laurai ka na tiko mai Bua, dua e tiko e na ulunivanua o Kasi ka vaka kina mai Dakuniba.

Na noqu vosa ni yalayala na rara ni waqavuka e Savusavu e na toso tale vaka ki waitui ka na bulu yani ki wai.

E na yaco na gauna me na ta kina na delana e Savusavu me bulu yani na waitui ena kena vakarabailevutaki na rara ni waqavuka.

E vakatalega kina na tauni o Savusavu ka na vakarabailevutaki ka donumaka e dua na delana ka gole vaka ki Labasa ka yacana o Waisali.

Kuria ka kaya ni na vakavinakataki na wavu e Savusavu ka vaka kina na wavu mai Taveuni.

Ni gauna sa na caka oti kina na na wavu, e sa na tosocake na i sau ni yaqona e Savusavu.

Mai na $30 ena gauna oqo, e na laki yacova sara tiko na $70 dua na kilo.

E na vakatalega kina na vua ni jaina dreu veimama e na gadrevi me na volitaki ka vakavodoki ka kau ki valagi.

Oqo na noqu vosa ni yalayala, e a vakadeitaka o koya e na yabaki 2011.

E na qai tomani tale yani.

More Stories