Tabua ni valu mai Nakauvadra

Update: 8:54AM ESE MAROROYA dei vinaka tu ga na Yavusa o Wainuqa ena koro o Manu, Wainibuka na i vau ni uludra na Tui Nalawa kei na kamunaga ka a kau mai Nakauvadra.

Dau i sakisaki tu ni dua na vanua ena veigauna sa oti na kena dau maroroi na i tukutuku makawa ka vaka kina na kena i yau me i vakadinadina bula ni veisemati ni veiwekani mai vei ira na noda qase e na nodra dau veitukunikataka sobu na i tukutuku mai vei ira na kena kawa e na veitabagauna.

Ia, na koro o Manu e na bati ni uciwai na Wainibuka e na Vualiku kei Tailevu e nodra i tikotiko na yavusa Wainuqa ka matata vinaka tu vei ira na kedrai tukutuku se i talanoa makawa na nodra qase ena gauna ni valu ka vaka kina na veika e dau caka e na gauna ni valu.

E vakaraitaka ko Jonacani Draunaturaga na i liuliu ni vanua e na koro vakaturaga qo o Manu ni o koya e dua na kawa ni ulumatua e na nona vanua ka dau nona i tavi me dau curu e na burekalou me sarava e na matanavotu na macala ni valu ni ra dau gole na nona mataivalu.

E tiko qo e dua na tabua e kena wa na magimagi ka dau vakayagataki ena gauna ni valu me tukunikataki ena yaco na qaqa se druka e na i valu, e kaya o Draunaturaga.

E tomana e na nona i talanoa o Draunaturaga ni tabua ka kena wa na magimagi qo e duatani sara na i talitali ni magimagi e caka tiko kina ka sega ni tautauvata kei na kena mataqali esa tiko e na gauna qo, e a kauta mai na nodratou qase mai Nakauvadra ena gauna era biubiu mai kina e na kena tawani na veivanua e Viti.

Na kena biu e na loma ni wai mai Nakauvadra na tabua qo me kua ni dua vei ira na turaga me kauta na tabua e a mani kauta mai na neitou turaga kei na kena i masi oya na drauniivi e olo tiko mai kina, e kaya o Draunaturaga.

E kaya ko Draunaturaga ena gauna era sa dau gole ki na i valu na nodratou mataivalu esa dau qai kau mai na dari ka qai mai lose kina na yaqona me qai dau laurai kina ena yaco na qaqa e na valu se druka.

E tomana ena nona i talanoa ko Draunaturaga, ni dau mai vakadavori sara vakamatau na tabua e na mua ni dari qo ka yacana na Botinakorovatu ia e vakababa toka na kena i davodavo ka qai mai lose na yaqona.

Na dari qo e vovodea no ka dau lose vakalailai ga kina na yaqona me tawana na loma ni dari, e kaya o Draunaturaga.

Ena veigauna kece sa dau tubu cake na i vakarau ni yaqona ka sa sivia na loma ni dari qo me sa rewa i cake sa kilai sara ni sa na qaqa na i valu.

Ia, na tabua qo esa ka vou vinaka tikoga ka ni ologi koto vakamatau e na loma ni drau ni ivi.

Na drau ni ivi qo esa kena i olo sara mai Nakauvadra ka dau kena i masi talega me masia vinaka tiko na tabua me rairai taliva kina, e kaya o Draunaturaga.

Ena draunivi oya ka sa qai mai olo tale yani vakamatau e na dua na masi. E kaya o Draunaturaga ni masi oya na i sala nei Tui Nalawa.

E a drutia rua na nona i sala tarara o Tui Nalawa ka solia e dua na kena i sema vei Ratu Naivulavula na neitou qase, e kaya o Draunaturaga.

E tomana o Draunaturaga ni vuna e mai drutia rua kina na nona i sala tarara o Tui Nalawa me soli vei Ratu Naivulavula ena vuku ni rau veitaudredre sara. Ia, e sega walega ni rau veitau dredre sara e rau a cakava na ka oqo me i dewadewa ka i tekivutekivu ni nodrau gaunisala ni veitukunitaka e dua na ka. Oya talega na veiwekani mai na vuvale nei Tui Nalawa kina loma ni vale vakaturaga e na yavusa o Wainuqa e na koro o Manu.

Na neitou maroroya tiko qo na i sema ni sala tarara nei Tui Nalawa mei vakadinadina ni neitou veiwekani ia e sega ni macala mai vua na vuvale nei Tui Nalawa e se maroroi tiko mai kina nai sema sala tarara se ratou sa vakayalia, e kaya o Draunaturaga.

E tomana e na nona i talanoa ko Draunaturaga ni tabua e tiko qo vei ratou esa i vakananumi tu ga ni gauna ka ratou sega ni qai mai qarava tale tiko se vakayacori tiko kina e dua na ka.

Keitou maroroya vinaka tu ga mei vakadinadina ni talanoa me rawa ni kilai ni a caka dina tu na veika oqo e na dua na dela ni gauna ka sega ni talanoa buli, e kaya o Draunaturaga.

E tinia o Draunaturaga ni ratou sa lotu ka sega tale ni qai mai qaravi tiko na tabua oya.

Latest posts

More Stories