Fiji Times Logo

Fiji Time: 3:39 AM on Saturday 19 April

/ Front page / NaiLalakai

Kubuna, Tovata kei Burebasaga

VILIAME RAVAI
Monday, December 10, 2012

E SA mai cava na noda vulica tiko mai na i cavuti vakaturaga ni veikorokoro e na loma ni veitikina vakaturaga e na veiloma ni yasana e tinikava e Viti Levu kei Vanua Levu.

Ia e na loma ni yasana e tinikava qo e ra wasewase tale tu ga vakamatau kina nodra dui matanitu ka ra okati kina.

E matata tu vakasigalevu ni tolu na matanitu vanua e Viti oya na matanitu o Kubuna, matanitu o Burebasaga kei na matanitu o Tovata.

Na matanitu o Tovata e wili tiko kina na yasana vakaturaga o Bua, yasana vakaturaga o Cakaudrove, yasana vakaturaga o Macuata kei na yasana vakaturaga o Lau.

Na matanitu o Kubuna e okati kina na yasana vakaturaga o Lomaiviti ka dau tukuni me ko Kubuna i wai, na yasana vakaturaga o Naitasiri, yasana vakaturaga o Tailevu kei na dua na i wase ni yasana vakaturaga o Ba.

Na matanitu ko Burebasaga e wili kina na yasana vakaturaga o Rewa, yasana vakaturaga o Nadroga/Navosa, yasana vakaturaga o Kadavu, yasana vakaturaga o Namosi kei na yasana vakaturaga o Serua.

Na matanitu o Kubuna na kena i liuliu na Vunivalu mai Bau ka cavuti e Kubuna vua na Vunivalu na Tui Kaba.

Na matanitu o Burebasaga e kena i liuliu na yasana o Rewa ka cavuti me Burebasaga vua na Gone Marama Bale na Roko Tui Dreketi.

Na matanitu Tovata na kena i liuliu na Tui Cakau. E kena i cavuti Lalagavesi na Turaga na Tui Cakau. E matata tu vakasigalevu na veiwekani vakadra ka solega koto na matanitu e tolu ka ra se veirokorokovi ka ra kila vinaka tiko na nodra dui i sema vakavanua kina veiyasana ena loma ni matanitu e tolu.

E na loma tale ga ni matanitu e tolu qo e matata vinaka na vanua ni kena vakayacori na soqo oya o cei e dodonu me na gunuva e liu na yaqona, vei ratou na matanitu e tolu, ia e ratou dau veisolisoli ga ka veirokorokovitaka me vaka ni ra matavuvale vata ga.