SA vakila o Cama Gu ni sa tekivu me vakababa na waqa oqo ka sa voqa ga na domo ni tagi kei na kere bula mai na vanua era tiko kina na pasidia na turaga, marama kei ira na gonelalai.
E sa raica nira sa veiciriyaki e loma ni waqa vei ira na pasidia e dua na yago ni marama ka kila sara nira sa mate. Ia, e na vanua e yaco kina na leqa vakaloloma oqo e donumaka na waitui loaloa ka titobu sara.
Oqo tale na kena i kuri.
Sa tekivu me vodo na ua e na loma ni waqa e na mataka ni Moniti na i ka 10 ni Tiseba ka ra sa veiciriyaki voli e loma ni waqa e so na turaga, na marama kei ira na i solisoli.
Sa tekivu me tawa na wai, sa kala na waqa kau sa biuta na waqa. Sa yacovas sara na gauna me sa vakatobuicu na waqa e na loma ni waiti loaloa ka salavata na kaukauwa ni cagi kei na veitubutuburi ni ua ki macawa.
Au sa raici ira na wekaqu na turaga, marama era sa leqa ga e na loma ni waqa. Na noqu lako ki wai au sega ni lade, au sa biuta ga na yasa ni waqa e na vanua esa vakalakala no kina. Oya e galala kina na noqu sa biuta na waqa, meu sa qalo tani yani mai na waqa, e kaya e na voqa ni domo ni vosa malua o Gu.
E kaya o koya ni sega ni dua na ka e taura e dua na ka me rawa ni kukube voli kina.
Na waqa e vuki sara vakatobui cu ka cowiri lala e macawa na kena i vocevoce ni sa bula tiko na kena idini.
Na gauna au biuta kina e so na ulu ni marama au raica e na poto holu (pothole) lalai. Lako mai e dua na kau au taura, lako ga mai na ua e kauta laiva.
Oti au mani kukube tale e na dua na i davodavo, lako ga mai na ua e kauta laivi. Sa mani raica e dua na dramu waiwai 44 na qaloni ni ciri toka ka tawa vinaka toka, e kaya.
E mani kalougata o Gu ni a donumaka na dramu oqori ka vakabibi ni tauri koya vakavinaka mai na veituburi ni ua lelevu e na wasawasa loa ka veiciriyaki kina kei ira na vo ni bula. Na nodra dui biuta mai na waqa era sega ni kila se o cei e tiko e loma ni waqa kei koya e lade bula yani ki tuba ki na loma ni wasawasa levu e na maliwa ni yanuyanu o Vatoa kei Ogea.
Taumada au via vakavinavinataka vakalevu na Kalou e na nona solia mai e dua na noqu i vudevude meu kukube toka kina e na vuku ni kaukauwa ni ua, e kaya.
E sa mani veiciriyaki voli e na wasawasa oqori o Gu e na mataka oqori ka taudonuya na draki rugurugua e na kaukauwa ni cagi ka salavata na ua kei na batabata.
E vakamuria voli na kui ni waitui me yacova na yakavi ni Moniti oqori.
Namaka e na macawa mai oqo na i kuri ni ciri oqori me yacova na kena bogi.