E VAKARAITAKA o Sailosi Torovi yabaki 80 e dua na lewe ni koro o Nakorovatu e Vunidawa, Naitasiri ni ratou gole mai Nayavu na yavusa Siko Koroqele.
Na nodratou lako mai Nasautoka na yavusa Siko Koroqele e liutaki ratou tiko mai na i ka tinikatolu ni makubui Seruvakula ko Ratu Qicovi. Na nona veikau tiko mai qo na turaga qo e rua na watina, ko Adi Vula kei Adi Anu. Na nona sa biubiu mai Nasautoka o Ratu Qicovi e vuna na nona sa kabai vakatolu o Nasautoka ka sa nakinaki kina me sa biuta mai na nona vanua.
Era muria mai na neitou qase na tai matau ni Wainibuka, e kaya o Torovi.
E vakaraitaka o Torovi ni nodra lako tiko mai qo e ra kauta tiko mai e dua na titoko ka vakatokai tiko me i dumu ni uca. E kaya o Torovi ni titoko oqo e kau sara mai Juta ka ra se kauta mai na nodratou qase. Na nodra lako tiko oya na turaga ni Koroqele e a qai mai kerea na i titoko ka vakatokai tiko me i dumu ni uca e dua na turaga ni Nabena ka lako tale tikoga ena i valu kei na vaqara vanua. A mani mai soli na i titoko oya vua na turaga ni Nabena me kauta kina nona vanua.
E na nona yaco mai na neitou qase e na vanua qo e Korovatu, e ra tawana tu e liu na vanua qo o ira na kai Verata, e kaya o Torovi.
Na i lakolako oya e ra mai tiko vakalekaleka e na dua na delana ka vakatokayacataki ga vua na nodra turaga oya na delana o Qicovi. Ni oti na nodra tiko mai Qicovi era mani biubiu mai ka ra mai tawana e dua na delana ka ra vakatokayacataka me o Koroqele. A vakaraitaka o Torovi ni sa dede na tiko voli mai Koroqele, e mani gole vei ira e dua na turaga ni Burenitu.
Na turaga ni Burenitu qo e a laki kerei ira na neitou qase me lai valuti o Nadaro, e kaya o Torovi.
Na vuni nona vinakati me laki valuti o Nadaro mai Tailevu ka ni ratou a vakamatea mai kea e rua na turaga ni Burenitu.
E kaya o Torovi ni valu oya e ra vakavuai kina na koro ko Nadaro, ia, ni sa oti nai valu e ra sa mani laki tu yani e so na neitou yavusa ka sa nodra mataqali tiko mai kea o Nauto ka ratou sa tiko mai Dravuni e Tailevu e na gauna qo.
A mani ra lesu tale mai na mataivalu ni Koroqele kei na mataivalu ni Burenitu.
Sa mai dede na kena mai tawani tale o Koroqele e a mani levaci ratou na neitou qase ni Koroqele e dua na turaga ni Siko ko Rokoligana, e kaya o Torovi.
A mani talai yani vei ratou na qase ni Koroqele ko Ro Sauturaga ka talai mai Navunidakua. Na vuni veilevaci qo oya ni dau matua na vudi vei ratou na turaga ni Koroqele e dau takosovi na Wainimala me taberi na kedra na turaga ni Rara e Naluwai. Ni namaka e na macawa mai qo na nona sa laurai e dua na turaga me buli e na nona sa mai tiko vata voli kei ira na tuarga ni Koroqele.