SA koto oqo e ra na i kuri ni talanoa nei Sega Tamani, e dua ni Moce , Lau ka a veiqaravi tu e na kabani na PWC mai Iraki ka a tauri vakavesu mai vei ira na batikadi dau vakacaca e na i ka 25 ni Feperueri, 2005.
E na gauna dredre oqori e a sega tale ni dua na nona i nuinui na Kalou taudua ga.
E sega ni dau guilecava vakarawarawa na veika e sota kaya ni sa tu sara ga e na bati ni bulubulu ena vanua e veiqaravi vulagi voli kina.
Ni wilika sara yani na kena i kuri.
E yaco ena kena mai leqa vakalailai na nona lori. Ni oti na nona dikeva na idini ni nona lori, a lade tale ki loma me tomana tale na nona i tosotoso e na nona saga me cemuri ira na vo ni lori era sa liu e na i golegole vaka ki Kuwait. E toka ena maliwa ni 100 ki na 200 na levu ni wiliwili ni lori ka ra yadravi tiko nai lakolako oqo na sotia ni Merika.
Na gauna a dikeva tiko kina na nona lori a sega ni kila ni sa totolo na nodra veitaratara na kai Iraki ni sa lutu tiko e dua na lori e muri.
E vakadomobula dina na nodra network ni veitaratara na kai Iraki, e kaya o Tamani.
Kaya o Tamani ni lakolako oqori kevaka e cici tiko mai Lautoka na i binibini lori ko ya ka vakatokai na convoy me gole ki Suva, e na veitomiki kece yani e tolo ni gaunisala vei ira na lori era via sema ki na i golegole oqori me vaka ni yadravi sara tiko vakavinaka mai vei ira na sotia ni Merika na i lakolako oqori.
E sega ni cici tu ga e na nona via gole ga e dua. E yadravi e na kena rivarivabitaki na taqomaki ni bula mai vei ira na batikadi dau vakacaca mai Iraki.
Ia, na i lakolako mai Pepeli mai Iraki oqo ki Kuwait era na moce mai e na vioca na vanua e sa vakarautaki tu ni bera nira yaco ki na vanua era mua tiko kina.
Ia, e na kena mai leqa na nona lori volekata e dua na wavu, e sa sega ni kila o Tamani na vanua era muria na vo ni lori era sa liu.
Era muria e dela ni wavu se ratou curu e ra.
Kuria ka kaya ni gauna sa vinaka kina na nona lori, sa mani saga me muri ira na kena, ia, sa sega ni laurai e dua na kedra o e na totolo ni nodra gutuwa.
Au qai curu e na ruku ni wavu me vaka ni rauta vinaka na noqu lori lailai au kauta tiko ko ya ka ya laki kele no e yasana kadua meu saga meu veitaratara kei ira na lori ka ra sa liu koya, ka me rawa talega vei au meu takoso yani ki na yasana kadua.
Au qai kele ko ya era sa wawa tale tu ga e kea e vica na lori.
Ni gauna au qai muria tale yani kina na gaunisala, au taura cake sara na noqu talevoni meu veitaratara kei ira na lori era sa liu. Ia, e ka ni rideu vei au nira sa yalovi au tiko eso era vodo lori ka tiko liu vei au.
Gauna talega oqo e sa kabi mai e yasa ni noqu lori e dua tale.
Ni namaka na cava e qai yaco e na macawa mai oqo.