E DUA na ka dredre dina vei Sega Tamani, e dua na turaga ka a veiqaravi voli tu mai na Tokalau e Loma e na dua na kabani ni Mereke nona a bula mai na bati ni bulubulu.
Dau tu yadudua na gauna e qai dau talanoataka na i talanoa oqo ni sa rui vakarerevaki ka sega ni dau guilecava vakarawarawa.
E sega ni dau kinoca rawa na levu ni nona luluvu ni gauna e dau talanoataka kina, aya e na nona sa donumaka tu na gauna dredre ni bula kei na mate, nanuma na marama watina ka vakauasivi o iratou na nona i solisoli e vale.
Oqori e na kena sa dodoki tu vei koya na dakai mai vei ira e so na batikadi vakaiyaragi ka sa sega tale ni dua na nona i nuinui, na Kalou duadua ga.
E vakarerevaki, ka vakaciriloloma, ia, sa dina sara na Kalou duadua e sa nona i nuinui ga e na bati ni bulubulu e sa laki tu kina kei ira na tauri yaragi ka ra wavokiti koya tu.
A dabe voli toka e na varada ni koronivuli na Moce District School e Lau me rai tu yani vaka ki waitui taudonuya na yanuyanu ko Komo, ka mani kerei koya e dua na wekana o Joji Cama me bau talanoataka na veika e a sota kaya.
Au a rogoca tu ga na veika a sota kaya, ia, e na vinaka meu rogoca sara ga mai gusuna, e kaya o Cama.
A vaka koto oqo na veika e a cauraka na turaga oqo, ko Tamani.
Keimami a veimuri tiko mai e na dua na yatu lori (convoy) ka keimami yadrava yani na i usana me keimami sa lesu tale ki Kuwait.
Kevaka keimami i lako tiko mai Lautoka, keimami na veitomiki kece mai na lori taucoko era gole taucoko tiko ki Kuwait.
Gauna keimami yaco mai kina e na i otioti ni tikotiko e Talili. Au draiva taudua tu ga mai e na dua na lori, ia, o ira na kena vo era yarua tiko mai e na lori, e kaya.
E kaya o Tamani ni cavuti na Convoy e kena i balebale tiko ko ya ni rauta tiko ni 100 ki na 200 na lori.
Kuria na nona i talanoa ka kaya ni nodratou i lakolako tiko mai e ratou a biubiu sara mai Pepeli (Babel).
E kaya o koya ni gauna e ratou gole tiko mai kina mai Pepeli e ratou a gadreva me ratou mai tomani iratou e na i tikotiko oqori e Talili.
Keitou qai mai veicalati e na i tikotiko ko ya ni gauna keitou qai yaco mai kina era sa veituitui mai ki tuba na i binibini lori.
Kaya o koya ni sega ni dua na lori e rawa ni curu takoso ga e loma.
E sa na vakamuria yani e na nona curu yani ki loma ni keba baleta ni dau yadravi sara vakavinaka na veilori yadudua.
Kaya o Tamani ni gauna e dau gole kina ki tuba e dau tiko vua na i vakatakilakila tikidua (ID card) ni Mereke.
Na vanua era dau via gole kina mera vakayagataka tiko na i vakatakilakila tikidua ko ya.
Au mani sasaga yani meu cemuria na lori era sa veituitui ki liu. Era tarovi au na ovisa kau tukuna vei ira niu cemuria tiko na lori era sa veimuri yani ki liu, e kaya.
Ni qai namaka na kena i kuri e na macawa mai oqo.