ESA vakilai na nodra yaga ena noda vanua, na noda lotu kei na noda matanitu o Talatala Mataere Muaror ka mai leqa ena i ka 15 ni Jiune ena yabaki oqo.
Era se qai yabaki 63, ka ra a leqa ga ena nodra vale mai Nadera.
E a vakayacori na lotu ni nodra vakacaucautaki ena valenilotu mai Davuilevu, na Baker Hall.
Na i tukutuku ni nodra bula na turaga oqo e laurai ni dua na turaga dau loloma, e valavala malua, turaga e yalo dei, bula vakaivakarau, dina, vakabauta, me vaka e vakaraitaka toka na Vunivola Levu ena nodra vunau ena lotu ni veitalaci.
Oqo na i tukutuku ni cakacaka ni Rev Mataere P Muaror.
E cavutu mai na koro o Oinafa, Rotuma.
Na turaga na tamadra o Petueli Muaror, na tinana o Kamoe Miseini mai Malaha.
Era vakawati vei Mani Ranige, ka cavutu mai Tumavia, Nakelo o Radini Talatala.
E va na luvedrau, dua na yalewa, ka tolu na tagane.
Eratou lewe walu (8) na makubudrau.
Na nodra i tukutuku ni vuli:
E vuli ga mai Rotuma mai na Paptea Primary School mai na 1956 kina 1961, laki dewa sara ki Malhaha High School ena 1962 ki na 1966.
Era tomana na nodra vuli na turaga oqo ena Univesiti ni Ceva mai na 1981 kina 1986, ka tauri i vola mai kina.
Ena 1994, era laki tomana na nodra vuli ena Davuilevu Theological College, ka ra rawata na diploma ena cioloji.
Era sega ni yaco ga e kea, era tomana talega na nodra vuli ena Bachelor of Divinity mai na 1998 kina 2000.
Ena 2002 kina 2003, era gole yani e Igiladi mera laki tomana tale na nodra vuli, ka ra rawata mai kina na nodra Masters of Arts mai na Manchester University.
Ni oti ga na nodra vuli mai Rotuma, era mai cakacaka sara ena tabana ni ovisa, ka ra tekivu cakacaka mai me dua na dauniveiqaravi - ( clerk) ka ra vakaraitaka na nodra kila kei na nodra matua, me yaco sara kina i tutu ni Principal Accountant ena tabana ni veivaqaqai ni ovisa se na CID.
E 26 kece na yabaki era cakacaka mai kina ena tabacakacaka ni ovisa.
Era cakacaka talega ena tabana ni Kasitaba mai na 1967 kina 1975.
Ena tabana ni i lavo ni matanitu ena Government Supplies, kei na Treasurer Department mai 1989 ki na 1990.
Ena 1989, e sa vakadeitaki kina me dauvunau, ka vakadeitaki me i Talatala ena 1993, ka ra laki vuli Talatala mai na 1993 kina 1999 me ra sa qai laki tabaki me ra i Talatala.
Ena 1997 ki na 1998 era cakacaka tu ena tabana vakailavo ni valenivolavola ni lotu Wesele.
Era sa qai laki qasenivuli vei ira na vuli talatala mai Davuilevu ena 2001 me yacova na kena mai kacivi oqo na nodra bula.